Moonlight chapter 1

Moonlight chapter 1 

Ziaktu:venpuii

Kut in thlâk ri chawrh chawrh thâwm ka hriat chuan ka tha a khur ti tih a,ka beng ka hupa,ka hawi chhuak ngam lo.

A sawisatu sawn a sawisa nasa si a,street light-in a en theih chin kawngpuia thisen luang ka hmuh leh lek phei chuan hlau tak hi ka ni ringawt tawh.

Ka mit chu ka hup rawk rawka ka thaw tha hleithei lo va,ka thauah min man bawk nen ka che sawn thei lo.

Ka khur hlawk hlawka, kalsan daih ka duh na chungin ka thei hauh lo thung.

Thawm a reha,ka mit ka meng chiah chu,"Ramhuai,"tiin ka au tuara,ka hmaah chuan mipa kawr dum ha hmai pem nasa zet hian chiang lutuk tak mai hian min lo ena kan hnai inhlat zawng chu kutzungṭang khat ang vel chauh a nih ka ring.

"Eng vanga min enthla nge i nih?"tih paha min phih lawpin street light hnuaiah chuan min kai rawk rawka,thisen a kawi nuai bawk nen ka hlau ngang mai.

Ka kut chu paih lawpin min rawn ena,chuta a hmel ka hmu chiang chiah chu ka phu zawk theiin ka hria,a hma aiin ka tha khur nasa a ka sai dawr dawr thei.

Ka tawng thei lo,ka hlau bawk si,tih ngaihna ka hre bawk si lo va ka ding ât ringawt.

Ni e,engtin nge ka tawng theih tehlul ang,ka hmaah hian ka mihring hriat tawha zawnga sual ka la tih ber Raphael Zothanpuia a ding miau a lawm le.

"Eng vanga min enthla nge i nih?"a ti leha ka chhang thei lo,ka kha a chih vek a lawm.

Ka biangah chuan na zetin a rawn hmer leha,"ENG VANGIN NGE MIN ENTHLAK?"chang khel khawl hian a ti leh.

"Ka,ka enthla lo che,ih ih ka,"ka sawi zawh hma chuan,"Dawt sawi reng reng suh,ka hmu reng che,"a ti leha ka hlauh lutuk vang chuan ka mittui a tling piau tawh.

"Thlawk bo rawh,"ti vin tuarin min theh lawpa,ka inring hman lo bawk nen ka tlu thlawrha,ka ke chu ka tlukna lamah ka sawha,a na ka tih lutuk vang chuan ka mittui a luang nghal zawih zawiha ka tap chhuak thei mai dawnin ka hria.

Ka hawi chhoh chuan Raphael-a chuan min lo chhuk melh kura thawh mai ka tuma ka ke chu a hik chhuaia ka thu leh nghal hnawk mai.

Ka hmaa mi chu chek hlukin min khai tho nawlha,min nghat chawrha,ka thu leh hnawk,ka insum thei tawh lo,ka tap chhuak hliam hliama kan awmna chu thing hmun reh lai a ni bawka ka tap ri chu ring tak a ni.

Ka hmaa mi chuan mak tih hmel zet hian min ena a hrethiam aniang min pawm thoin,"Tap ka thlêm thiam lo,bang rawh anih loh chuan i chak lo viau ang,"a ti a, ka tang bang nghal.

Bang loin tah chhunzawm ngat ila zawng min that duh mai ang.

"Khawi vengah nge in awm?Ka thlah ang che,"a tih chuan,"Immh,ka haw thei,"tih pahin chhuk ka tuma,"I chiang chiah maw?I theih ka ring lo,"tih pahin ka ke rek chu a hmer ngheka,a na lutuk chu ka ngik chhuak feih feiha a bike lam panin min pawm phei nawl nawla,ka hnial ngam tawh der lo.

A bike-ah chuan min nghatin a rawn chuanga,a helmet chu khumin a bike chu a start a,"Khawi vengah nge in awm?"a ti leh ka hnial ngam tawh loh vang chuan tha deuhin ka hrilh ta ringawt.

Chak zetin a tlana,ka tlak ka hlau lutuk chu ka thu khawng luaha,ka invuan taia,ka thaw dep dep ringawt.

A tlan muan leh deuh hnu chuan kan in awmna min zawt a,tha deuh chuan ka hrilha, thlen vat vat tluka chak ka nei lo.

Kan in kawt kan thlen chuan ka chhuk tharha,ka ke a hik nghal chhawk mai.

Bai sawih sawih chunga gate awmna lam ka pan chuan tu emaw hian min rawn kuai her deuh sawka,ka en chuan amah bawk a ni.

Min kaiin kan in sira thutna awmah chuan min nam thu a,eng nge maw tih a tum ni ka tih rauh rauh laiin ka crocs chu a phelha,ka ke chu thlek vutin a hmeta,ka insum hman lo,"Mawla,"tih pahin a sam buk zetah chuan ka keka ka mittui ka biangah a lum thla pap bawk.

Hamhaih zeta a rawn hawi chhoh chuan ka harhchhuak zawka,"Ka tihpalh,ih a na ka ti lutuk,"ka ti tuau a, a hmel atang hi chuan min vaw sâwp vek duh tur hmel a pu miau a ni.

Min chhang lo chuan a hmet leha a dim ve ta deuh,van lam chu ka hawia,thla a lo eng bial kalh mai.

Mit chhingin thawk ka la vang vanga,ka men leh Raphael-a chuan min lo melh kar tawh,"Va lut rawh,"a ti a, bu nghatin pai tuang tuang chung chuan gate ka hawnga, ka chhungte chu zin hlauh lo se chu ka chawh vet vet viauin ka ring.

Ka hming chu Valentina Lalruatpuii a ni a kum 21 ka niin tunah hian 2rd sem ka zir meka,fanu mal ka ni a,ka pa hi MCS a ni a,ka nu erawhin thawmhnaw dawr a nei thung.

Kawngka chu hawngin ka lut a,ka duh anga ka ke ka hman theih loh vang nge,chet a sawt lem lo.

Kawngka ka kalha,rei fe ka beih hnuah inchung ka thleng thei hrama,ka room-ah chuan ka luta,ka hah viau tawh,ka nu leh pa zin ka lawm ber tum a ni hial ang.

Bathroom-ah chuan lutin ka hmai te chu ka phih a,ka zawh fel hnu chuan khumah ka let tawpa,ka mut a chhuak ngang aniang ka muhil zui nghal thuai bawk.

Ka hmai ka parda zar kar atanga ni zung lo lutin a rawn chhun chuan ka inlet thawka,ka ke na deuh zawk vang chuan ka thu nawlha,harh a chiang duh ngang mai.

Sana ka ena,dar 6 a lo ri vang tawh,tho chhuakin ka intifai thuak thuak a.Saturday a ni bawk nen college kal ka ngai lo va,ka ke a na leh zel nen in awm tlawk tlawk ka ngaih hmel.

Ka ke chu ka tuam a,ka ulh anih ka ring Zothanpuia vang vek kha,sual si ngeiawm si hlauhawm si,a...si hlir hi a nimai.

Kan college hi an ta a nih miau avangin tu te pawn kan hlau tawh sa a,hlauh tawh sa nak alaia lo la hlauhawm belh kher,a peih hi ka ti.Keini aiin an upa a, 5th sem an ni,amah chu sawi loh a thiante thleng thleng pawh hian keichuan ka hlau.

Ka chhungte an awm lo bawk nen chawhma chhung chu in tih fel nan ka hmanga,ka ke chu a nuam lo bawk nen chet a har talh a,chawhnu lamah phei chuan ka mu tawp tawh.

Ka mu chu ka lo muhil a,ka harh leh chuan dar 5 a lo ri tawh,thoin ka intifaia cabinet-a ka noodles chu ka la chhuak a,ka chhum ta ringawt ka eng ei mah pawh a tho lo.

Ka noodles vil lai chuan ka phone a rawn ri a,ka en chuan ka nu call a ni,ka pick vat a,ka inbiak zawha kan dah meuh chuan ka chau hnawk thei,ka nu biak hi chuan kan tawng loh pawhin beng hi a na urh thei zel,sawi tur hi chu a ngah ve thin tak a ni.

Kan inbe rei lutuka ka noodles chhum pawh a dai hman vek,ka thil ei zo ka in tih fel zawh meuh chuan dar 7 a lo pel thui viau tawh.

Lehkha ka zir peih miau loh vangin inchungah hla ka ngaithlaa,thla bial zan a ni bawk nen thla chu a êng ngang mai a,ngaih nei hauh si lovin ka lung chu a leng êm êm ringawt.

Sana ka en chuan dar 10 a lo ri tawha,inhnuaia ka chhuk chuan thil ka hrechhuak zawk.

Kan professor-in assignment min pe tak,chhuk sawk sawkin ka room-ah ka lut a,A4 paper ka lo nei tawh reng reng lo, zanina ka ti lo anih chuan naktuk zan thleng pawn ka zo hmanin ka ring lo.

Pawisa chu lain kawngkhar ka kalhin dawr lam ka pana zan a rei ve deuh tawha ka hlau ve deuh hlek tawh.

Rin lawk ang ka ti dawn nge hlauh ang ngeiin ka ti zawk dawn,dawr hnai ho chu an inkhar vek tawha, kan thenawm dawr lahin A4 an nei ve ngai bawk si lo.

Ka duh emaw duh lo emaw kawn kal ngei ngei ka ngai dawn,thil dang chu ka hlau a ni hran lo,ramhuai hi a lo lang thut anga,min dawlh nawlh ang tih mawlh ka hlau.

Kan veng reh lutuk ka ngei ber tum anih ka ring,kawn kal tur chuan nizana Raphael-a ka hmuhna thing hmun kha kal pel ngei ngei ka ngai dawn bawk si,thingkungah khan ramhuai lo inkhai ta se tih te chu ka ngaihtuah a,ka kal hreh leh hnuhnawh.

 Thing hmun ka kal lai chuan ka sir te chu a melh hian ka melh ngam lo hrim hrim a lo lamg thurh ang tih ka hlau lutuk.

Dawr ka thlen meuh chuan ka thaw huai huai a,ka leitur ka lei zawh chuan in sang mar ṭulh ṭulh chungin ka kala ka thil lei chu a khaina min pe bawk si lo.

Ngaw ka thlen leh dawn chuan ka hawi hrak hraka,mit chhinga thaw chhuak hakin ka kal a,thing hmun chanve vel ka kal tawh ang tih ah chuan tu enaw ka su chawrha,ka tlukna lamah ka paper ken zawng zawng ka thlauh vek chu thuhran ka ke na lai tak mai chu lei charah ka vuaa,ka then tlawk tlawk.

Ka hmaa mi lah chuan,"Hawi ta che,"a meizial zuk ham gam pahin a la ti mai mai zuia ka thinrim lutuk tih ngaihna ka hre tawh bawk si chu ka mittui a parawl kiang a,ṭhu chung chuan paper tla ho chu ka chhara,ka hmaa mi chu phun hlukin min kai thoa,a hmel ka en chiah chu ka hlauhna a belh chhah chiang lutuk.

Raphael-a, min hria ni hmiang a min ko san rulhin min en a,kal mai ka tum chu min kuai letin chiang zet hian min en a,ka ke chu zuk melh zeuhin min kaih a tuma ka ke chu ka chet tha ngam meuh lo.

Ding chawtin min ena ka inrin hmain min pawm nawlha,ka meng phawk nasa lutuk,tal thlak ka tuma,"Ti khan awm mai mai rawh,"thu pe aw zetin a ti a,ka tal tawp nghal riai riai.

Thla êng hnuaiah chuan a hmel chu chiang deuhin ka hmu thei a,meng rum tak a ni,kan in bul gate a thutnaah bawk chuan min thut tir leh a,ka ke ka tuamna chu phelhin a la kang a,dim tê tê hian a hmet a,van chu ka lo en daih thung.

Arsi thlawk ka hmuh rual chuan,"A khi,khi enteh arsi thlawk,"ka ti a,van lam chu a rawn hawi ve a,min rawn en leh a,"Analh zia khi,"nui vur vur chunga ka tih chuan,"Naupang chhia lutuk,"a ti zeuha,ka ner nawk a,a rawn hawi chho chuan min hmu leh sia,inthlahrun awm duh tak a ni.

Phone ri ka hriat chuan ka hawi thlaa a phone chu pick in chiang zet hian a ngaithla kar a,a beka thisen zam pawng ṭawlh chu ka hmuh hmaih lo nasa.

A dah hnu chuan min rawn enin,"Tei kual vak vak lo mai rawh,ka kal a ngai,"bung lutuka tiin a kal a,a kal liam chu ka enzui ringawt.

A kal hnu chuan ka bai lut aih aih a, ka ke chuan min tur ut ut leh nghal a,na tak a ni.