HELLO OFFICER 💞 chapter 1

HELLO OFFICER 💞

Ziaktu: venpuii

Oii ka rei!ka hmaa car nalh leh changkang zet ka sut rual chuan ka ding nghal chawt,a va han tih chi loh mai mai tak...ka pi leh pu'n an hriat veih chuan ka chan chu a chau rau khawp ang le.

"I mawl em ni a?"ka scooty bulah chuan mipa lian zet hi a rawn ding nghal a..a hrawl ti zawk teh ang.

Min chhuk en run a,sawi tur chu a vang pharh mai,"Eng vangin nge I rawn sut ve ngawt a?"a tih chuan ka sa ve phat,"A neitupa ang mai i car hi a tawng lutuk anih hi..."dah chhoh vah pahin ka ti a,min chhuk en ve run bawk.

"Te si,tawngthei si,nghal si,I thiam loh zawk ania ngaihdam min dil la ka ngaidam ang che,"inkuang kuah thân paha a tih chuan,"Iiiii,nang val senior ka te reng reng lo aw,ka duh leh ka tawngthei ang, khawvelah hian tawng thei lo tawng chak ngawih ngawih an tam lutuk,"ka ti a,min en vung vung mai.

"Tawngthei ve hle mai,"a ti ta ringawt a,"Ni e...tawngtheia ka awm hi Pathian malsawmna,"ka ti a,"I tawngtheih lutuk vang hi aniang i tawi em em."

"Nang pawh aia naupang i hnial zuah zuah thin vang anih hi I senior em em,"ka ti a, tlangval senior hmel phei chu a pu lem hlei lo va.

"Ka car chu aw..."tih pahin a car ka sutna chu a en a,ka inthiam lo ve chawp chilh nghal.

"A chhe nasa viau em?"tim daia ka tih chuan rum deuhin min melh let duh lek chauh,ngaihno bei taka melh chi kha ka ni lo ve bawk a ni.

"Eng zat nge a siam man niang le?"ka ti a,min melh zawkin,"Theihnghilh rawh,"a ti hluk a,a nawm loh dan a ril lutuk ringawt,ka sawi thiam dan ber chuan a ruka zak deuha tawrh chi.

"Workshop-ah dah ila,ka number ka pe che ang nga...chawi tur chu keiman ka chawi mai ang,"ka ti leh a,a tawng bawk si lo va,a nuam hlawl lo.

"A ngai lo ve,"a ti leh a,hepa hi min ti inthlahrung telh telh..."Aih a nuam lo..."ka tih pawh chuan min melh rulh duh ringawt chauh.

"Ka khalh thiam tir chauh ania...bakah.."ka tih chuan,"Tar ki ring te...inher la I scooty-ah sawn thuin va haw nal nal rawh,"a ti leh a, chuti na na te chu ka va han kalsan awm tak.

"Val senior phunchiar,"tih pahin ka inher a,ka scooty-ah chuan chuangin ka tlanchhuak nghal nal nal.

Lalnunsangi ka ni a,kum 22 niin ka patea te college-ah ka kal mek a,6 sem ka ni ve tawh.

Ka tet tê atangin ka pi leh pu hnenah ka khawsa a,kan unau hi 4 Kan ni a,a te ber leh hmeichhe awm chhun ka ni bawk.

In ka thlen chuan ka puin ka kalna min lo zawt a,"Remremi u a lo haw dawn a,an in cheipuiah min sawm a,ka pi bulah ka hrilh kha..."ka ti a,a bu zeuh a,engmah a sawi tawh lem lo.

 Chaw ei khamah chuan ka thiannu Remremi te ina kal tumin ka insiam a,amah lo hi ṭhian pakhat ka la nei a,Rintei a ni.

Rintei nen hian kan seilian dun a tih theih,a nu leh ka nu hi ṭhian tak an ni a,keini pawh chuti tho,Remremi nen hi chuan middle school kan kal aṭangin kan inhria a,kan pathum hian inzui chawt kan ni.

Scooty ka ken ngam tawh thlawt loh vangin taxi ka la a, ka thlen ve meuh chuan an lo tam tawh lutuk.

Inchhung ka luh rual chuan Remruatkimi'n min kai per lawp a,"I va lo thleng har..."a lo ti nuah nuah.

"Har a mi,khawnge u Puipuia chu?"ka ti a,min kaiin,"Hetah lo kal la...sawlaiah sawn an awm,"a ti a,ka bu nghat.

Min kaih pah chuan an in atanga ka let lehin car ka sut thu ka hrilh chuan a nui ri uar uar a,Kan inhnial dan ka hrilh leh lek phei chuan ril tla tur hi a ang ka ti ber.

"Aw..hei heta hi ka naute chu an awm,"u Puipuia aw ri ka hriat rual chuan ka hawi chhuak a,u Puipuia bula mipa ding ka hmuh rual chuan ka phu zawk thei.

"Ka rei...val senior,"ka tih chuan phawk deuh tak hian min en a,"Tar ki ring,"a ti a,"In inhria em ni?"u Puipuia chuan a lo ti a,a khi ṭhaw a,"Hre teh nang,"ka tih laiin,"Hre thawi fua,"a ti ve thung a.

"Zorem,hei ka nau Remremi ania chuan hei a thiannu leh ka nau ni bawk Lalnunsangi anih hi.."a ti a,an hriat loh lamah ka ner char char.

"An va fel hmel ve...hei phei chu a ṭawng tam loh hmel,"min en pahin kan val senior-a chuan a rawn ti kher a,"In inhre sa...a dik em?"u Puipuia'n a mit tih zim san paha min en chuan,"Teh nang,"ka ti a,val senior-a chu enin,"U Puipui,i ṭhianpa hi avan senior hmel..."ka ti ve ta sak a,Remremi-te unau annui dun hak.

"Senior lutuk lo ve...kum 29,"a ti a,Remremi chuan min kai nghal dawr dawr a,a room-ah min hruai lutin,"In inhre sa chiang...."nui vun vun chungin a ti a,thil awmdan ka hrilh chiah chu a.puak lo chauh,a duh tawk a nui aniang,"Ti nge Rintei nen in lo kal loh,"a ti a,"A nuamsam lo va...bakah a chhuak peih chiah lo deuh a,"ka ti a,a lo hrethiam ve mai.

"Zoremsanga anih kha police officer,"a rawn ti a,"Tu maw?"ka lo ti hê haw a,min kuk ṭawlh chak hmel lutuk.

"Aw...ka u ṭhianpa kha,a bawn lutuk,lehlha a thiam sia,"a rawn ti a,a ṭawng siam siam laiin ka ngaithla liam vel mai mai thung.

Dar 9 a pel hret tihah haw ka rawt a,ka haw tur Remremi'n taxi min chanpui lai mekin u Puipuia leh a ṭhianpa kha a n lo kal a,"Sangsang i haw tawh dawn wm ni?"u Puipuia chuan a rawn ti a,"Imm haw tawh mai ang,"ka ti a,"Hei Zorem rual hian haw la, in veng a inhlat chuang si lova,"a rawn ti a,"Aih,"ka ti a,ka duh teuh lo mai.

"Ngati maw?"u Puipuia chuan a rawn ti leh hram a,amah ka ngei ber ṭum a ni hial ang ka ring.

"Va chuang mai la..."Remruatkimi zek zuk chuan a rawn ti a, hemite unau hian tum a nei chiang lutuk.

"I phur tel hreh em?"u Puipuia chuan senior-a lam hawi chuan a ti a,"A duh leh duh loh,"tih zawngin a chhang.

Vawiina kan intawndan vang hrim hrim pawh khan a bula awm ka hreh ania,chua chhapah min la thlah dawn zui ania,ka va han hreh lungrun ve leh.

"Imm...anih chuan a pawi lo mai,"ka ti ve ta rawih a,"Ka car ka va la ang,"tih leh min lêtsan a rual a,rei lo teah lan bulah chuan car dum a rawn ding a, vawiina ka sut kha chu a ni lo.

"Hei hi em ni a thar chu?"u Puipuia chuan a rawn ti khauh a,"Ni nang le...ina ka haw tur ka hnunglam aṭangin tar ki ring deuh mai pakhat hian min sutsak a..."a ti a,min rawn en kher anih chu.

"Val senior,tar ki ring ka ni reng reng lo aw..."ka ti vin hlar a,u Puipuia chuan,"Nangman em ni su a?..."min en pahin a ti a, ka chhang kher lo vang.

Ka chhan leh chhan lohin awmzia a nei lo,a hmel aṭang chuan a hrethiam tih hriat reng reng.

"Sangsang,han lut rawh le,"a ti a,hreh deuhin ka lut a,kan tlanchhuah hnu chuan,"Tar ki ring,khawiah nge in awm?"a ti a, ngaihtuah chiang mang hlei lovin,"Jerusalem-ah,"kan ti ngawt pek a,"Dangdai ṭhin ve,"tih riin a zui zat.

Kan veng awmna chu ka hrilh ta tho a,a hmui a pet sawi zeuh a,a chimawm ve thawkhat tih chiang reng.

Kan inkawt kan thlen chuan,"Imm...a tawk e,"ka ti a,a ding ve mai.

"Ka lawm e aw..."tih paha ka en chuan min rawn melh zawk a,a bu nghut ringawt.

Ka chhuk a,inchhung ka luh dawna ka hawi let leh chuan a motor aṭangin min lo la en ve reng.

Ka muhil chu kan ṭhenawmte nupa inhau thawmah ka harh a,khua a lo eng iarh tawh.

An pa zawkin,"Chhuak rawh Lalnuncham,"a ti chhuak ṭhawt a,nu Chami'n,"I thaw fresh anih chu,"a ti pawr hlur a,an pa bawkin,"Ka nei peih tawh lo che, inṭhen vang vang ang,"a ti a,nu Chami a duai duh bik lo,pawr fe mai hian,"I mumangah pawh a thleng lovang,i duh leh nangmah kha chhuak rawh,ka ma nghal a che,"a ti a,ka nui khur char char.

"A zah pawh hi i zak lo em maw ni le..."pa Dawnga'n a ti a,nu Chami'n,"Zahna tur a awm pawn ka van hre lo ve..."a ti a,"Imm..khawi pawisa lo la la,sum ka chhuah nghal ang,"pa Dawnga'n a ti a, ka rei..he mite nupa hian Mizo Customary Law an va han pawngsual hneh ve leh....