Nothing's gonna change

Nothing's gonna change

Ziaktu:venpuii

"Rinzual, ka fapa a lo haw dawna,"ka in luahna nuin phur hmel êm êma a tih chuan mak ka ti lutuk.

"Fapa in nei maw,"ka aw atang pawh chuan mak ka ti tih a hriat ka ring.

"Aw,nei e,a hrisel lo lutuka kum khat teh meuh Mumbai-ah a inenkawl tawh, ji"a ti a.

"Eng natna nge?"ka tih chuan,"A natna tak hi an la hmu lo,hmani deuh kha chuan 'Ka zia e' atia,"a ti a.

"Nu Dawng,i pangpar hi a va dangdai ve,"pangpar pakhat kawh vâ paha ka tih chu a nui sen sen mai.

"Zothana min lo hawn ania,"a ti a,ka bang bo hmel a hmuh chuan,"Ka fapa Zothantluanga kum 25 a ni ve tawha,a puitling thei meuh lo,racing leh i lo vel hi a buaipui bur mai sia,tih ngaihna a vang thin khawp mai,han hauha han tih chiam dawn hian a hrisel lo sia,kan neih chhun a ni bawk nen a pa hian a lo chhan zel mai bawk sia,"a ti a ka lo nui hak hak 

"Ka zu lut phawt a nge aw,"tiin an inhnuaia ka in luah lam chu ka pana kawngka chu hawng vatin ka luta.

Lalrinzuali ka ni a,kum 23 na ka hmang meka,ka nu hian min boralsan tawha,ka pa chu a la dama mahse a nupui leh a fahrawn nena kan inmil loh em avangin kan in atangin min chhuahtira,khata tang khan ka be tawh lo tluk a ni.Tunah hian ka pain ka eizawn nana a tih thawmhnaw dawr ka enkawl mek bawk.

Rawng ka bawl sawk sawka,ka phone a rawn rik avang chuan ka thil tih lai dahin ka va laa,ka en chuan ka thaw chhuak halh Muanawma ka phone chu ka silent a,ka ning tawh lutuk, Muanawma hi ka dawr thenawma dawr neitute tupa a ni a,min duh thu a sawi fo thin,hnar chikima ka hnar pawh hian awmzia a awm ngai lo tih theih a ni.

Ka chawhmeh chhuan lai chu off-in ka purse ka laa,kawngka kharin dawr lam ka pana,step atanga ka chhuah chhoh rualin Nu Dawngi kawtah a lo awm rana,mipa pakhat lian zet mai hi a kuah chuk chuka,Nu Dawngin min rawn hmuh rual chuan min rawn hui lauh lauha,ka kal hnai ve mai bawk.

"Zothan hei Rinzuali anih hi kan inhnuai khu a luaha,chuan Rinzual hei ka fapa Zothantluanga,"nui sang hian a ti a,a hlim hmel lutuk tlat.

Zothana lam chu ka hawia,a sang lutuka ka chhoh en vah mai,mit ti zim sun hian min lo ena,ka kaw chhung hi endik a tum anih ka ring ti taka chianga in en te chu..

"Nu Dawng dawrah ka va kal lawk a nge aw,"Nu Dawngi en pahin ka ti a,nui sen senin a lo bu nghut mai.

Dawr atanga ka let leh hnu chuan ka hminga min ko ri ka hriaa,ka leh hawi chuan Muanawma ka va hmu ta mai,ka mak ti lutuk chuan gate chu hawng loa kal ka tuma,ka hmai ka toha,ka van thinrim mai mai tak.

Nui ri kur kur ri ka hriat chuan thawm lo chhuahna lam ka hawi a,Nu Dawngi fapa chu a lo then thaw mai,ka vawm sawk mai dawn em mawni.

Kal pelh ka tuma a thu rawn sawi vang chuan ka ding chat,"I hmai kha vurin dep rawh aw,"a ti a, a nui kur kur mai.

Rum fea melh pahin,"I thu lo lek luk emai,"ka ti a,ka kal nal nal.

Inchhung ka luh chuan ka thu hnawka,tunlai chu dawrah kan buai bawk nen ka chau ngawih ngawih mai.

Chaw ka ei fel hnu chuan in tifaiin ka thu dar dara,kawtah chuan bike ri a ring ngang mai,a bengchheng lutuk chu ka thinrim hlur tawh.

Ka kawngka an rawn kika,ka va hawn chuan Zothantluanga a lo ding runa,"Kan ride dawn i lo kal ve duh em?"a ti a,"Duh lo,in bike khi in ti ring lutuka,"ka tih chuan a nui suka,"A la ring dawn chauh,"ngeiawm zetin nui chungin a ti a,ka ngei lutuk.

"Ka beng a chhiat chuan beng dar man ka thing ang che,"tih paha kawngkhar khar mai ka tum chu a rawn dang hmana,zawhna mitmengin ka lo en.

Min enin a mit a ti zim sana bu nghut nghutin a kal nal nal hrilh hai zetin a kal liam chu ka en ta ringawt.

Kawtah chuan an tam viau aniang an nui ring si,kan Mimawla pawh a tawng ring lutuk,an bengchheng lutuka,ka khumah ka tal tawp tawp ka va han ning zozai tak.

Zanrei lamah chuan an reh ve thei hrama,zingah chuan thawh ka hai chiang lutuk ka insiam fel meuh chuan dar 10 a ri vang tawh Mawlmuka-te vang vek.

Inkalh sawk sawkin step-ah ka chhoa hmuh peih loh rilruk nak laiin kan Mawlmuka pek chuan a bike ni awm tak hi a lo hru hluau hluaua kal pelh mai ka tum chu,"I beng chu eng nge a an?"a rawn ti a,ka thaw halh,"Lo kal rawh ka chhuak dawn,ka thlah nghal ang che,"a ti a,"A ngai lo,ka kal thei,"ka ti hmuk.

Kal leh mai ka tuma Nu Dawngin min rawn au leh ka inhera,"Bawiha hi i dawr awmna lamah a kal dawna,kal rual ula,tukin chu i tlai riauin ka hria,"a rawn ti a,hnial chi ni tawh hek lo khi vur vura min lo entu lam chu ka pana min lo be buai lo se chu a ruala ka kal hi a ngai awm chai si lo,ka va han hne ngawih ngawih em.

A bike-ah chuan a thu a,a hnung a sang si ka chuang peih mawlh lo,kan inphur chhuaka, rapthlâk zawk hian a tlan chak si,in sehruh tun chung chuan ka chuang tluan ve zaka,ka chuang nawn tawh dawn lo reng reng.

Dawr chu ka hnathawk chhawr Zamtei'n a lo hawng diam tawha,lawmthu hrilh ve ta thoin ka lut nal nal.

Nilengin kan buai a tih theih, customer an kat ve nawka,thawmhnaw, pheikhawk leh bag lam hlir a ni naa,kan inhralh tha phian thin,kan awmna hi a ual aua dawrtu kan ngah thei hle.

Thawmhnaw lo thleng thar ho chu a then in lama stock ka rilruka,kan dawr hi a zau em em loa chuvang a ni pakhat.

Hawn tur ka thliar buai laia dawr chhunga lo lut ka hmuh chuan ka hamhaih ngang mai.

"Ihi eng nge i rawn tih dawn?"ka tih chuan a khi vur vur mai.

"Ka lo hruai dawn che,ka nuin rawn lam kawi rawh a ti chea,"khi vun vun chungin a ti a,"Ka la buai taxi-in ka haw ve thei,lo va haw rawh,"ka tih chuan a lu a thing nak nak a.

"Ka lo nghak ang che,"atia ka duh lo reng reng a tlan chak si,a bike hnung a sang si,awiii si hlir animai,"A ngai kher lo,lo va haw rawh,"ka sawi zo chiah dawr chhungah chuan Muanawma a rawn luta,ka ner nawk,hmuh peih loh nak laiin nilenga a rawn kal lo lo lawm ve tehreng nen.

"Anih Zothantluang ti khan min lo nghak rawh,"ka ti a,anih loh chuan Lalmuanawma hian min thlah luih a tum ka hlau,chu ai chuan Zothantluanga bula nilenga awm pawh a nuam zawk ang chu.

Zothantluanga lah chuan a hrethiam aniang chu a nui saka,a lo bu nghut mai.

"Ka thlah haw ang che,"rin ang ngeiin Lalmuanawma chuan a rawn ti a,"A ngai lo,Zothana nen kan haw dawn,"ka tih chuan Muanawma chu a hawihai deuha Zothantluanga a hmuh takah chuan a chhuak nghal nal nal ka lo thaw huai huai thung.

Tlai dar 4 velah chuan ka hman ve ta chauha,door chu kharin a bike hnung sang zeta mipa lo thu chu ka pana,a bike hnung chu enin ka thaw chhuak halh.

"Lo chuang rawh,"a aw ki chu a nelawm teh chiam lo,hmm lo nelawm loh mai mai teh se haw tura ti lo pawh ka ni bik lo.

Kan tlan chhuaka,a tlan chak ngang mai in pawh kan thleng hma lutuk.

"Ka lawm e,"ti a kal mai ka tum chu ka kuta a rawn vawn vangin ka ding leh rih inherin zawhna mitmengin ka ena.

"Tunge kha pa kha?"hma lam melh runin a ti a,ka hawi â heu ringawt.

"Tu mipa maw?"

"I dawra lo kal,thlah tum tu che kha?"a ti a,amah chu enin,"Muanawma anih kha,"ka ti a,a mit a ti zim leh sun tawh.

Kal leh mai ka tuma,"I eng nge anih?"a ti leh,"Ka hmelhriat satliah,"ti sam etin ka inhera,ka kal nghal nal nal.

Zothantluanga lo haw atangin thla khat a liam tawh,zantin an kawtah chuan an thawm laih laih zrmela dar 12 dawnah lo chuan ka muhil ngai meuh lo, Zothantluanga pawh a nghal ngaiin a la nghal renga ka melh no lo thin viau mai.

Tlai khat dawr atanga ka haw chu gate ka hawn dawn lai takin kan veng ami U Faka'n min rawn au dinga,min nuih sangin ka dawr chanchin te chu min zawt ve a,ka chhang tha ngam mang meuh lo a chhan pawh thawk khat lai khan min beiseia pawh lo sa tehreng nen khata tang khan ka pawh lo leh zual.

Eng eng emaw min zawh hnua ka inher chuan Mawlmuka chuan a bike ngheng meuhin min lo en kura,rum zeta melhin ka chhuksana.

Rawng chu bawl ve leh naw nawin ka bawl zawh veleh ka eia,a la hma bawk nen sofa-ah chuan thuin chinese drama ka en kuala,ka kawngkhar an rawn kik karh karha,tho thurha ka va hawn chuan Zothantluanga hmel rum lutuk ka hmachhawn nghal siah mai.

"Eng nge i,"ka sawi zo hman lo rawn lutin min pawt her nawka,zu rim a nam huam mai.

Ka kut chu na zetin a hmera bangah min nawr bet nawk,mak ti zeta ka en chuan,"Tinge ka hmaah hian i nuih ve ngai miah loh,mawh tinge,ka nu te,midang leh kha pa hmaah kha chuan nelawm zetin i nui thina,tinge ka hmaah hian i nuih ve duh loh,"a ti a,ka ka hau mai.

"Eng nge i tih?Eng nge awmzia?"mak ti zeta ka tih chuan,"Eng nge?Eng nge ka tih maw? Lalrinzual nang hian min ti â zo tawh anih hi,min bual â vek eng vang nge?"a ti a,"Engtin mah ka ti re re lo che,"seh chilh nawkin ka ti a.

Ka bianga rawn dawm pah hian,"Ka duh che, Lalrinzual,"a ti ta maia,ka hamhaih lutuk,mak ti bawk si chuan eng mah ka sawi thei lo,"Ka duh che,mipa dang emaw nuihin be tawh suh,ka bialnu ni turin ka ka duh che,"a ti bah nawk nawk mai.

Ka mak ti lutuk chu ka ngawi kar reng ringawt.

"Ka bialnu ni rawh aw"

"Zothantluang,i rui anih hi,han chho rawh"

"Aih min chhang phawt rawh,ka bialnu i nih loh chuan ka haw dawn lo,ka riak ve animai,"a ti buan buana,ka thaw chhuak halh.

"Han chho rawh"

"Aih,min chhang rawh Rini,ka bialnu i ni duh em?"

Avan hahthlak tak,"Han haw,"ka sawi zo hnan lo re re,dim zetin ka hmuiah a rawn fawpa,ka â riai mai.

Min thlahin ka hmui chu a kutin a tuai heuh heuha,"Ka duh che,"fiah zetin a ti leh nghat ka ni hu mai hian ka hria.

"Maw,"ka ti ta ringawt.

Nui sukin,"Ka duh che, Lalrinzual,"a ti leh a,awm dan tur ka thiam lo reng reng.

"Han chho phawt la,"ka ti a,a ner nasa viau mai,"I ruih lai anih vang mai maia tianga awm hi i nia,"ka tih chuan min thing nawk mai.

"Lalrinzual ka zep lo,zu chu ka in mahse ka harhfim emaw fim lo emaw ka chiang kei hian ka duh che,i ngawl ka vei anih hi,"a ti a,ka ni huih ni berin ka hria.

Ka chala fawp zeuhin,"Ka han chho phawt ang,khawi maw i number?"a ti leh zat,tha tak chuan ka pe ve maia,a chho zui nghal.

Mut hmunah chuan ka inlet tawn seka,ka phone a rawn ri a,ka en chuan ka nu nau fanu,Sawmsangi a lo ni.

Ka la vat a,ka lak rualin,"Mate,i dawrah chuan a la thawh theih em,ka pa hi ka ning, pasal min neih tir teh a tuma,i bula rawn awm daih mai ka duh,"a rawn ti a,ka lo phur lutuk.

"Naktukah lo kal la i thawmhnaw nen keimah chiahin ka awma a khawharthlak thei lutuk lo awm ve daih rawh,"ka ti a,kan phur dun lutuk.

Zingah chuan ka phone a rawn ri a,ka en chuan number hriat loh atangin a ni,ka mut a la chhuak em em leh nghal.

A pawimawh takin tiin ka pick-a,"Hello,"ka tih rual rualin,"Keimah,ka ruih a reha,mahse ka la duh tho che,"a rawn ti a,a dah leh nghal,tu dang a ni thei lo Zothantluanga a ni chiang lutuk.

Sunday a ni bawk nen inkhuh tha sauh sauhin ka mu leh hmak.

Ka thawh chhuah meuh chuan dar 10 a lo ri va tawh, kawngkhar an rawn kika,lut tura ka tih hnu reiloah Sawmsangi bawr zetin a rawn luta,ka lo nuih var var.

"Ka chau vek,awii ti hian ka fin ve rawt che nga,hnathawh tur emaw ka zawng ang a,"a ti a,"Hnathawh tur zawn kher a ngai lo,ti hian kan awm dun char char dawn nia,dawr saw kan enkawl dun dawn nia,"ka ti a,a inthlahrun hmel deuh.

"I lo inthlahrung vel mai mai ang nge, inthlahrunna tur a awm miah lo ania,"ka ti a a lo nui mai thung.

Dar 11 velah zing chaw kan eia,in te tifaiin chawhnu lamah chuan kan mu dar dara,ka message tone a rawn rik chuan ka en vata, Zothantluanga message a lo awm khiah mai.

Minute 10 ka nghah hnua ka en chuan tum loh lutukin ka nui chhuak hak.

"Zana ka len i phal em ka bialnu?"tih a ni,nui hakin ka chhang let lem lo,chhan let ngaihna chai ka hre lo.

"I ka reh kha,i ka reh kha,a var huah mai,khi tawh lul suh,"Sawmsangi'n a rawn tih chuan ka nui tawp hmak.

"Ka khi re re lo Malsawmsang,"ka ti vin hlura,"I phat nasat viau tawh hi chuan ka sawi dik ziah,"a la ti ham ham zui, nghal tih thumal hi eng nge a definition ti se Malsawmsangi ka tih ka ring tiang khawp chuan a nghal.

Tlaiah chuan rawng kan bawl duna,kan nui thler nasa lutuka,ka pum a na vek tawh,"Ka pum chhungril tak hi a na,"a rawn tih chuan ka lo nui hak,a tawngkam hi mak viau thin mahse leh lam kawng taka ngaihtuah hi chuan a nuihzathlak phian zel.

"Sawm,enteh tu emaw thla khat vel chauh i hriat khan nizan khan a duh thu che a hrilh che a,rui chungin zingah khan a harhfim tawh hnua a la duh reng thu che rawn sawiin bualnu chei ta che sela,i nihpui duh ang em?"ka tih chuan a ang phuau mai.

"Kan nula senior hian tunge i lo duh ve tak?Tuin nge i thinlung chu hneh ve ta?A va ropui em Lalpa ka lawm e,"a ti vei duaha,ka melh rawm rawm ringawt.

"Ve a che,kei aiin a thla chiahin i naupang Malsawmsang,"ka ti a,a lo nu liam mai mai eng vanga kha tiang te zawt ringawt nge maw ka nih le.....

 

Zanah chuan sitting room-ah thu chungin T.V. kan ena,kan kawngkhar a rawn rik chuan lut turin ka chhawn a,beisei lo lutukin Muanawma a rawn lut hlawla, ka va han vawm chak tehreng tak.

Sawmi chuan min rawn thut hnaih pah hian,"Amah hi em ni?"a ti a,ka lu ka lo thing,a hmu tawh reng sia a hre lo em maw ni.

A lo kal hnaih deuh chuan,"Ka hre leh si..."a ti a,ka chhang zui lem lo.

"Lo thu rawh,i va fel ve,"mawi hawiah ka ti ve a,a ruk tak chuan ka ning ang reng.

Rei pawh a thut hmain kan kawngka a rawn ri leha,ka lo chhawn leh,Zothantluanga ngei mai chu a rawn luta,rawn thu ta mai lo chuan Muanawma chu a ena,min rawn en lehin a hmui a pet sawk nanga,a chhuak ta daih....

Ka thawh chhuah lai ka hre lo,ka har chhuaha ka thul tih ka hriat meuh chuan a kut ka lo vuan der tawh.

"Eng nge?"

"I lo lut dawn emaw tia,i chhuak leh daihha,"ka tih chuan,"Va lut rawh,i bialpa a lo len kha,"a ti bung nghuta ka en vung vung.

"Ka bialpa zawk hetah i awm daiha,"ka ti a,ka sawi zawh rualin ka lei ka seh zeuha,a lo nui haka.

"Sawi nawn leh lawk"

"Imhhh,ka zak e a"

"Sawi nawn leh la kan ni nghal,"uang thuang fahrana a tih chuan ka lo nui haka,"Duh lo ta ila,"ka tih chuan ka sam tuai zeuha.

"Sawi lo pawh ni la kan ni nghal,"a ti a,"Ti tê hian maw?"ka tih chuan ka hnara piai zeuh pahin,"Aw,ti tê mai hian,"a ti a,ka nuih sen sen.

"Va lut rawh ka lo en ang che,ka lo lut lo mai ang,ka lo bia ang che,"ka kawngah a vuana,ka lu tuai zeuhin ka chhipah a fawpa, ka luhsan ve mai.

Rei lo teah Muanawma pawh a haw a,mut hmunah Sawmi nen chuan kan titi a,ka message tone rik hun ka chan vangin ka la muhil lo a ni ber mai.

A tawp a tawpah chuan a rawn ri ve hram a, amah ngei a ni,ka phur lutuk mah mah tiin keimah leh keimah te chu ka inhau leh rih,a message chu ka open-a,"Ka thleng chiah,ka lo in report,i mu tawh em?"a rawn ti a,nui vur vurin ka type ve leh.

"Aw,mu tawh e,i va haw har awm ve,"ka send rual ruala a seen vangte chuan ka khi vur vur nia mawle,zahthlak hian.

"Min lo nghak a ni maw,i la mutthilh loh danah,nia,haw an phal tlat lo a,"a message ka chhiar lai meka,"Awii,ahh mipa i bia law?Khawvel hi a bungbu zawngin a awm a ni lo maw?"Malsawmsangi chu a muhil daih tawh ang chu tih nak alaiin.

"Zanina mipa lo lut zuai chhuak leh ta daih kha mi i sawi chu?"

"Imm"

"Awii anih ka ring rengah,a hmeltha tawp in inhmeh ngawt ang,mahse nang aiin a naupang em?"uang thuang zeta a tih chuan ka nui ve ta tawp.

Rei lo te Zothantluanga nena kan inbiak leh hnu chuan phone dahin kan muhil ta a...

Ka muhil lai chu ka phone riin min ti harha,ka en chuan Zothantluanga a ni,dar 5 a lo pel tawha,ka lak rual rualin,"Good morning,ka rawn wish zuai che,kan mu leh lawk,i dawr kal tur ka thlah ang che,"a ti nghal zung zung.

"Min thlah thei lo ang,Sawmi nen kan kal rual a ngai dawna,"ka ti a,ka hawi kual chuan Sawmi chu a lo mu tawh lo,choka lama thawm a awm takah chuan a tho tawh anih ka ring.

"A va pawi,"a ti vawng vawnga,ka nuih a za ang reng.

Call kan tih tawp chuan hmai phihin ka chhuak a,Sawmi'n rawng a lo bawla min lo nuih sang mai,"I mutui em?"a ti var a,"Imm tui lutuk,nang,"ka tih chuan,"Tui over," nui hak hak chungin a ti a,a rawngbawl chu puiin chaw pawh kan ei hma viau mai.

Ka insiam chhungin a lo han chhuak chhoa,ka han chhuah ve chuan Zothana nen an lo ding duna Sawmi'n nui vur vur chungin ka lam a lo pana,"Thil tih lawk tur ka neia, Zothana rual sawn kal mai rawh,"a ti a,gate lanah chuan chak zetin a tlan nghal nal nal.

Zothantluanga lo awmna bul ka thlen chuan,"Sawmi kha i kaltir a ni chiang,"ka ti a,a khi vur vur mai.

"Lo chuang la,"tih pahin a bike-ah chuan a lawna,lawn ve nghalin kan tlan chhuah hma chuan,"Tinge i taksa hi a va duk nasa ve,in insual em ni?"ka tih chuan,"Sual lo e,ka taksa hi a duk nasa lutuk tunlai chu,"a lo ti maia,kan tlan chhuak ta a.

Hun chu a liam ve zela,Nu Dawngi pawhin Zothana nena kan inkar pawh a hre har lo,a thinrim ka rin laiin a hlim em em a,chutih laiin Zothana leh Sawmi an inngeih thak lo a,zantin a rawn leng thin, ka chik deuh nge tunlai phei chu a cher riau a,a chhan ka zawh lah hian ka in diet a ti mauh mai zel si.

Ni khat chu dawra ka awm laiin Nu Dawngi hnen atangin call ka dawnga ka pick rual chuan,"Rini,e hei Bawiha hi ni khaw hre loin a lo awm reng maia,damdawiin kan panpuia,tunah test hrang hrang an nei mek e.."a rawn ti a,"Nu Dawng khawi damdawiinah nge?Ka lo kal ang,"ka ti nghal sawk sawk.

"Lo kal kher pawh a ngai lo,"a ti a,"Aih,ka lo kal ang khawi damdawiinah nge in awm?"ka ti leh,ka hrethiamlo ka hlauthawng a ni.

"Aizawl Hospital-ah kan awm,lo kal kher a ngai lo Rini,kan awm a lawm,"a ti a,"Aih hei ka lo kal,"tiin call chu ka ti tawp a,Sawmi hnenah thil awmzia hrilhin Aizawl Hospital lam chu taxi lain ka pana ka rilruin ka tawngtai mawlh mawlh.

Kan thlen chuan damdawiin kawtah Zothana pa a lo awma,min hmuh rual chuan lo va lut tura min hrilhin an awmna chu min hrilha,ka pen hlawk hlawk.

An awmna lai nia Pa Nuna'n a sawi chu ka thlenga,Nu Dawngi'n min hmuh rualin a rawn tap ta rawih rawiha,a ngaihna ka hre lo hle a,ka mangang hle bawk.

"Rini,ka duh thei lo,engtin nge kan tih ang ka fapa ka lainat emai,"tiin a tap rawih rawiha,"Nu Dawng, eng nge Zothana chungah thleng?"ka ti bah nawk nawk mai.

"Rini,Zothana hi a cancer,thisen cancer a nia,tih dam ngaihna a awm tawh lo,in lama in enkawla,a rawp ral lai en tawp hi a nimai,"a ti a,ka thu hnawk eng thil nge thleng?Lalpa eng nge awmzia?

Ka khur hlawk hlawka,Nu Dawngi lah chuan min tah khum rawih rawih mai si inhnem thei kan awm loa,a tua te pawh chu kan hrilh hai tlang a ni.

Pa Nuna rawn kal hnai oah chu Nu Dawngi bawk chuan a lo taha,ka na vawng vawng mai.

Doctor-ten 'In lamah inhawn ula hetah pawh tih theih a awm chuang loa,mahni in ngeiah thlamuang takin chawlh tir ula,atan a nuam zawk ang'an toh avangin in lamah kan in hawna,nitinin ka hmangaih chu a chaua,ka kalsan a phal ngai lo,zanah pawh ka riah chilh chawta,mi min sawi dan tur pawh ka pawisa lo,ka pawisa bawk hek lo vang.

"Rini,balcony-ah chhuak leh tawh ila,"rawn ti tu chu ka ena,bu nghutin zan tin kan tih thin dan chuan a room balcony lam chu ka panpui a,kan thut thinnaah chuan thutpuiin van lam chu kan thlir duna a ngawih vang vang hnua a thil rawn sawi chuan min ti lainat zual a ni.

"I vanduai tiraw,kei min tawng hi...lo hre hma ila chuan nang hi duh lo tur chea in thunun ka tum tur a nia,"a ti a ka tawng chhuak thei lo,tawng ka tuma,a ri thei reng reng lo.

"A pawi ka ti"

"Eng vangin maw pawi i tih?"

"Natna ka thlen reng chea,mi bialpa ang ka nih thei lo a,chu zawng aia pawi ka tih chu maw,tar khup biha i dampui ka ni thei dawn lo tur hi a pawi ka ti a,na ka ti bawk,"a ti a,ka hmui ka peta,engmah ka sawi thei tawh lo.

"Hun tlem te chauh ka nei tawh tih chu kan hriat dun kha,heng ka hun tlem te la neih te hi i kianga hman vek ka duha mahse,khita ka kalsan hunah che nangmah ti naa,i mittui ti tla tu an nih ka phal si lo,"a ti leh a,ka kuah ta ringawt.

"Min hmangaih hi pawi i ti em?"a ti a.

Ka beih fe hnuah,"Khawvela thil awm zawng zawng hi danglam pawh nise,eng thil mah hian nang ka hmangaihna che hi a ti danglam ngai lo anga,pawi ka ti ngai lo anga,ka ti ngai bawk hek lo ang,"tiin ka chhanga,min rawn kuah ve pah hian van lam chu a thlir leh.

"Ka kalsan hunah che chuan zan tin van khi i lo thlir thin anga,arsi-a ka chan chuan chhum a zin chang pawhin chhumin a hliah lohna zelah rawn langin i nileng hun hman dan te min hrilh thin anga,"a ti leha,ka insum ve hram hramna te chu a phet chiang lutuk ka tap chhuak haka,ka khur ngawt ngawt.

Che sana a hmel en ka tum chuan a zawi veka, hlauthawng lutukin ka sawia,a che lo,ring zetin Nu Dawngi ka ko a,ka bula mi lah chu a che tawh dêr lo.

"Eng nge ni?"tiin Nu Dawngi a rawn tlan pheia, Pa Nuna'n a hnungah a lo zui bawk,kan awm dan an hmuh chuan Nu Dawngi chu chak zetin a rawn tlan pheia,ka lo tap pur tawh mai si.

"Nuna motor kha zuk la chhuak rawh,ka fapa hi,"a ti a, Zothana chu zawnin car-ah kan chuang a, damdawiin kawng te chu a thui ka ti lutuk.

Nu Dawngi nen chuan Zothana kan in koh chhhawka,a rawn chhawn eih lo.

ICU-ah an luhpuia,ka tawngtai mawlh mawlh,ka thut chawt chawt laia nutling tapin,"Lalpa,a la hma i ti lo em ni?Bawiha,ka van lainat tak che em..."a ti tlawk tlawka, ka â riai a, ngaihtuahna fim ka pu thei tawh lo.

ICU atanga mipa an rawn nawr chhuah chu kan pana,ani erawh tui taka muhil ang maiin hahdam hmel a pu a,ka thlir ta ngawt ngawt.

A hmai dang belah chuan ka khawih a,"Imm,tunah chuan i dam tawh e,arsi-ah changin min lo thlir reng thin rawh aw,"ka ti a,damdawi in atanga in kan pan leh lai pawh engmah ka hre lo,engkim,engkim tak meuh chu ka hre lo,ka vai riai a,he thil thleng mek hi mumang ni se,harh chhuah ka duh tawh,he mangchhia lak atanga harh chhuah hi ka duh tawh.

In kan thlenga,ka harhfim ve ta chauh, khumah an zalha,a ruang chu ka kila, ka tap thei hauh lo,ka tawt up up a,a ruang chu ka en ngawih ngawih.

A dam na kha ka duha,mahse a dam dan erawhin lung a va dam si lo em.....

Zankhuain a ruang chu ka thut chilha,midang an tap rawih rawiha,kei erawh ka melh ngai ka melha,ka tap lo va, ka tawng hek lo.

Zing khua a rawn vara,kuangah an daha,a kut chu ka chelha,kan intawnni hmasa bera min en dan mitthlaah a rawn lang a,kha mi ni kha chuan kan pahnih hian kan inngaizawng anga,bul kan tan tak tak hmain hetiang hian min kalsan ka ring ngai lo, mihring hian hma khua hi kan van hre lo tak em.

Thil pakhat hriat chhuah ka neia,a beng hriatah khan ka hmangaih thu tak ngial pawh ka lo la hrilh ve lo,a beng zawnah chuan ka kuna,"I lo thawh leh a ngai ania aw,Zothan,ka hmangaih thu che pawh i beng hriatah ka la sawi ve lo."

"Min mangtha tur leh ka thusawi tur ngaithla tur tal hian vawi khat chauh kha i mit han meng leh hram teh..."

Ka chalin a bek ka zu si a,ka tap ve thei ta,thawl erawh ka thawl phah lo,ka ngai ka ngai takzet..

Dar 1 a ri a,a kuang an chhina, thla kan lakpui lai te chuan engmah ka ngaihtuah thei tawh lo,thlalak an zo a,thlamual lam an panpuia,ka bulah chuan tu tu te nge awm tih pawh ka hre lo,ri engmah ka hre lo va,kuang an zawnna lam chu ngawi rengin ka pan mawp mawp.

A ruang an thlaka,leiin an chhilha,ka tap khur ngawt ngawt,ka tah nasat vang nge,ka thawkah min hnawha,ka thaw tha hlei thei der lo.

Ka khaw hmuh a thim riai riaia,ka mit ka men rualin ka bula Sawmi thu ka hmu a,min bia chuan ka hria,mahse eng mah ka hre lo,ka thu chawt chawta.

SAWMI POV:

U Zothana thih atangin ni thum a liam tawha,Rinzuali'n engmah a ei duh lo,a thu chawrh chawrha,kan biakin min chhang lo va,an en ngai a en tlawk tlawk ringawt.

A ni li ni a ni a,a ngaihna kan hriat tawh loh em avangin vawiin hian damdawiinah electric-a shock tir mai kan rilruk a ni.

Pa Nuna leh Nu Dawngi'n min kalpuia, motor chuan chhung zawng pawn a khap fek feka,a tawng lo va,a mit chu a taksa lang thei china che awm chhun a ni.

Damdawiin chhungah kan lut a,electric-a shock zawh hnu chuan rawn hawi chhuakin mittui tling pur hian min rawn ena,ka lo kuah nghet sauha.

Tunge ring ang Lalrinzuali hmeichhe chhel tak,mipa ngaihsak ngai map lo kha tunah mipa vangin tiang hian a awm ang tih hi,nia ka hria a tuar dawn tih chu mahse,tiang em em hi chu ka beisei lo.

RINZUALI POV:

Ka hringnun chu a ni telin a chuaia,dam thlahlel êm êm thin khan thiha,a kianga kal ve tluka chak ka nei ta lo...

'Mihring dam chhûng hi tawi tê a ni'an ti thin mahse,ka tan chuan a rei lutuk.A tello nun chu huan zau taka pangpar mawi tak taka vul thin,a enkawltuin a enkawl theih tak loh avanga a par chuaia,a hnah til tawh leh a kung ro tawh ang mai hi a ni.

A chhuahsan tak he lei hreawm tak hi chu a rawn thlahlel ngaiin ka ring lo, mahse,a kalsan tak a chhungte leh kei hi min rawn ngaihtuah kir thin angem?Ka beisei,ni lo,ka beisei mIlai ni loin ka ring a ni.Chhum zinna piah atang khian kan sulhnute kha a rawn chhui kir ve thin ngei ang...

Mipa ka ngaihsak zui lo va, ngaihsak ka duh lo, Zothantluanga kha a hmasa ber,a tawp ber leh a awm chhun ni turin ka duh a ni.Zan tin van lam hawiin ka thlir thina,ka nileng hun hman dan sawi turin min ti thina,ka sawi ve foa,ka sawi tluan thei ngai lo,tap chung bawkin a ni ka thlah leh thin ni.

Engtik niah emaw chuan a kiangah ka la kal ve anga,thlah leh ngai tawh lo turin siamtu hnenah a kut vawn ka dil ngei ang.....

                         A TAWP TA