Moonlight chapter 15

Moonlight chapter 15

By:venpuii

Kan inbiakna kan tih tawp hnu chuan ka intifai a, chhungkaw chaw ei khawm an rawt vangin mu leh ta chuang lo chuan midang rawngbawl ka pui a,tunu neih chhun ka ni bawk nen mut thlurh thlurh kha ka tan a rem lohna chin a awm ve a....

Ka pi te nula nen chuan rawng kan bawl a,ka laktlak fahran lo khawp mai.

Rawng kan bawl zawh chuan chaw eiin a zui a,ka chauh tawh êm vang chuan ka puin mu turin min ti a,ka hnial lo chiang asin...

Room-ah chuan ka chho nal nal a,khum ka deh rual rualin ka muhilin ka hria.

Ka phone riin min ti harh a, ka en chuan Raphael-a phone call a lo ni,missed call a lo tam ngang mai.

Ka phone sana ka en chuan dar 10 a lo la ri lo deuh a, ka pick rualin,"Call i va la thei lo ve,"a rawn ti nghal a,ka insawifiah zawt zawt mai.

An rik deuh laih laih vang chuan a awmna ka zawt a, Hannah-i te inah an leng anih hmel.

Kan inbiak lai pawh chuan an rawn in ṭawng chhawk zuah zuah hlawm a,lung an ti leng ve dawn dawn mai.

An zinga awm nuam ka lo tih hmanzia ka hriat phah bawk.

"Aw..anih i mu duh tawh ang,mu tawh rawh naktukah kan inbe leh dawn nia,muttui Duhawmnu,"a rawn ti leh hram a,hmai chhanah ni lo mahse ka lai leh dawn dawn mai.

Kan dah hnu chuan Delancy ka bia a,a rawn phul nasa ngang mai,min ngaih thu ngawt a sawi a, keipawn ka ngai lutuk.

Dar 11 pelh dawn thlengin kan inbia a, ka muhil thei mai lo leh nghal a...ka meng reng a,ka mutthilh ve meuh chuan khua a var lo chauh tawh.

Dar 7 velah ka piin min rawn kai tho a,u Kimkima-te ina kalpuiah min rawn sawm a,amaha kaltir ai chuan tiin aw ka pawh a,a chhuah hnu chuan Raphael-a chu ka wish a, ka tih tur hrilhin ka tho a,ka mutna thlep fel sawk sawkin ka hmai ka phih a,ka sam ka ṭawn a,ka hman der.

Inhnuaia ka chhuk chuan ka piin min lo nghak reng tawh a,u Kimkima-te hi venglaia awm an ni a,ka pute veng aṭanga a hlat tham loh vangin kein kan kal a,kan thleng har lo.

Kan lut chiah chu nu Dami a lo phûl hlut a, kan awm rei phian mai.

Kan let leh lam chuan ka piin a ṭhiannu te tlawh kawi a duh thu min hrilh a,in pakhat kawtah hian a ding bawk.

Kal ve ka tum lai mekin ka phone a rawn ri a, lut ve ta lo chuan call chu ka pick a, Raphael-a phone call anih vang a ni, in sirah chuan ka ding a,"Hello,"ka tih rualin,"Morning... Duhawmnu,"a rawn ti leh a, hepa êm êm hi chu aw....

"Eng nge i tih dawn?"a tih chuan,"Awm awl leh ei tui,"ka ti a,a nui ri kur kur mai.

Kan inbiakna kan tih tawp leh hnu chuan inchhunga luh ve mai ka tum a,phun hlak hlak thawm ka hriat chuan ka ding dat a, nutling awin,"Remruatsang,eng vangin nge ka kawr ṭha hi i ui note kawrah i lo cheh chhiat a,"a tih chuan ka nui hak a,a nghal ve awm hle mai.

"Ka khawi fin hunah chuan...."hmeichhe awin a tih laiin,"Khawiah khawiah i khawi fing lo ang,i khawi hma aiin a mawl tawh zawk saw.."nutling khan a ti leh hluk hluk mai.

Nui kar kar chungin inchhung luh ka tum a,ka pi a lo chhuah leh tâk si vang chuan lut ve ta lo chuan ka lo nghak a.Kan inzui haw leh hnak hnak mai.

In kan thlen chuan chaw ei a lo hun leh reng tawh...ka pite nula nen bawk chuan chaw ei kan siam a,chaw ei lai chuan chaw ei kham lama ka pu naute in lama len an rawt a,ka pu'n ka kal ve duh leh duh loh min zawh chuan,"Thawmhnaw tih fel ka ngai a... ka lo kal ve lo mai ang,"ka ti a, ka chhuah peih lohzia an hre bawk a min sawm lui tawh bik lo.

Dar 10 a pel hret tihah ka pu naute in lamah chuan an phei diak a... ka pite nula nen chauh kan awm a,in a tihfai laiin ka room-ah ka thawmhnaw ka dah fel a.Ka dah fel zawh chuan ka kawng a kham urh thei.

Ka phone ka en chuan Raphael-a message a lo awm a,khik vur vur paha ka open chuan thlalak pakhat hi a lo nia an ṭhianhoa an thlalak hi a lo ni.

A dinna sirah chuan stickman pakhat hi a awm a,a lu chungah,'Thanghniangi,'tih a lo awm kulh a,hepa hi...min ziak chawp ve ngei em maw ni, Dylan-a sirah pawh stickman pakhat a awm leh a, Delancy tih a lo inziak leh kuau mai a va han hahthlak ṭhin tak em...

"Stickman hmuhin min hmu chiang...."tih chu ka va thawn a, a seen mai lo leh nghal, rei deuh hnuah chuan ka message tone a rawn ri leh a,ka en chuan,"Stickman angin hmu che ila ka thlaêng i ni ka ti nang che....Valenty Thanghniang,"a rawn ti leh a,hepa hi...ngah nge maw Thanghniang tiha min koh tlat mai le....

"Ramhuai,nga ti nge Thanghniang tiha min koh tlat a..?"tih ka thawn leh....

"I hmelṭha em alawm," a rawn ti teh daih a,ka va han lai mai mai tak.

"Eng nge i tiha...?tih ka thawn ta daih anih loh chuan leh tawp tawp bak hmabak ka nei leh dawn lo.

Ka phone chu a rawn ri a,ka en chuan amah a ni,ka pick rualin,"Duhawmnu,"a rawn ti leh nghal zat a, ka ning min ti lai zel.

"Mi hi bawl tum ve ziah suh,"ka ti bah nawk nawk a, sawi tur ka hre tawh hlawl lo.

Nui kur kur chungin,"Tunah khan i lai chiang...."a rawn ti leh a,ka hang up daih,hepa hian min ti â thei mai dawnin ka hria.

Christmas a liam a, keipawh kumthar hmang turin vawiin hian ka nu cousin-te rualin ka chhuk dawn a,ka pite'n min chelh an tum viau nain min pawttu hian a zir em a,chhuk lo thei ka ni lo.

A telloa ni 10 chhung rei zia lah tuman min hriatpui kher lo vang.

Nupa rek an ni a,mamawh lam tura kal annih vangin an bawr lem lo.

Ka bungrua chu motor-ah an lo dah lut tawh a,ka kal dawna ka pi hmel mawlh chuan awm a ti nuam lo,kal lo tura min duhzia ka hmu thei.

Mahse ka tum laklawh tawh si a, ṭhulh keh ngawt theih lah a ni lo.

Min vai liam lawp lawp a,kan inzui nasa ve bawk nen min ti hnim ve ruih thei mai.

Nu Ziri-te nupa chuan min be ve reng a, zan lam ka mut ṭhat loh vangin kawng chanve vel kan thlen chuan ka lo muhil daih a,ka harh leh chuan Aizawl khaw chhung kan lo lut der tawh.

Kan in awmna te chu min zawt a, ṭha deuh chuan ka hrilh a, Delancy chu call-in min lo chang turin ka ti a,kan inkawtah chuan min lo nghak a,ka chhuk chiah chu min kuah ta chuk chuk a,min ngaih thu chu vawi engzat nge a sawi pawh ka hre tawh lo e a.

A awmdan vang chuan nu Ziri-te nupa pawh chu an nui tawp.

Ka bungrua chu an pa chuan a rawn hlang a,an hmanhmawh deuh tawh vangin an kal leh nghal a, Delancy'n kawngkhâr a hawn lai chuan Raphael-a ka lo call thung a.

A pick rual rual chuan,"I lo thleng tawh tiraw,aw hei ka lo kal nghal..."a ti a, call chu a hang up zui daih.Delancy pawh chuan zing lama a lo kal leh tur thu min hrilhin min kalsan zui a.

A sawi danin a cousin-ten chaw an ei a, buai chung chungin a rawn kal anih hmel.

Ka nu chu call-in ka thlen thu ka hrilh a, fimkhur turin min rawn chah nasa mai.Kan inbiakna kan tih tawp hnu rei lo tê...minute 10 vel chiah a liam tihah kan kawngkhar chu an rawn hawng a, Raphael-a ngei mai chu a rawn lut a,min hmuh rual chuan min rawn panin min kuah vawng vawng a,"Ka ngai lutuk che,"a ti a, min kuah vawng vawng mai.

"Keipawn ka ngai lutuk che..."ka tih chuan min kuahna chu thlahin ka hmuiah a rawn fawp a, ka thiam ang tawkin ka chhang let a,a duh tawk a ngah hnu chuan min thlahin,"Ka lo riak dawn,"a ti a,"A theih loh,"rang fahranin ka ti a,"Haw lehna chi pawh a ni tawh lo,ka mut a chhuak tunah dar 11 a ri ṭep tawha ka inkhalh haw leh chuan ka che sual vel ang,"a ti vei zawrh zawrh a,a duhnaah te chuan sawi tur tlachham mawlh hek lo.

"Ka lo riak..."a ti a,dil tak tê hian min dil reuh a,ka khawngaih tlat pek,"Immm...kawngka kan kalh ang a,ka suitcase hi ka room-ah lo han dah la ka lo chho ang,"ka tih chuan nui sukin ka biangah a fawp zeuh a, ka suitcase chu lain ka room-ah a chho a,ka han chhoh ve chuan a lo mu fel diam tawh.

A sirah chuan ka va inthawlh ve nghal a,ka kawngah min lo kuah nghal chat.

A awmah chuan min kuah bei hlu hlu a,a rim pa zet chu ka hip lut vang vang.

Ka han hawi chhoh chuan rawn kun hniamin ka hmuiah a rawn fawp a,"Muttui leh Duhawmnu,"a ti leh a, ka mit chu ka chhing zui vang vang.

Ka hmai za mer mer vang chuan ka meng siar siar a, Zothanpuia chuan min lo en reng tawh.

Puan chuan ka inkhuh nghal hlun a,a nui ri huk huk mai."Ramhuai..."ka ti leh tawh.

Ka puan chu a rawn keu thuk a,"Ka va tawh ang nge...Duhawmnu,"tih pahin ka hmuiah a fawp zeuh a,a tho a, tukverh aṭang chuan a chhuak leh.

Sana ka en chuan dar 4 a lo pel tawh a,a vawt lutuk a, ka la tho peih lo.Phone ka en a,ka lo mutthlih san leh daih.

Ka harh leh chuan dar 9 a lo pel tawh a,ka tho chhuak ṭuih ṭuih a, ka hmai chu phihin inhnuaiah ka chhuk a,rawng ka bawl thuak thuak a, ka ei ve meuh chuan dar 10 a pel duai tawh.

Chaw eina ka tih fel lai mekin Delancy a rawn lut heu a..."Leng ang..."a rawn ti nghal zung zung.

"Khawiah?"ka lo ti thuai a,"Len kual mai mai, inah ka awm peih tawh lo,"a ti a, ka hnial lem lo.

"Lo va insiam la...ka lo sawm phei ang che,"ka tih chuan a tlan chhuak nghal rawk rawk mai.

Keipawh inchungah chuan chhoin ka insiam a, Raphael-a chu ka call pah.

Vawi 2 ka call nawn pawh chuan a pick thei lo reng reng a ring quit ṭhak a,a buai anih ka rin vangin ka call nawn duh tawh lo.

Ka insiam zawh hnu chuan ka chhuak a, Delancy-te in lam ka pan a,ni dangah call a la zat zat ṭhin kha ania tuna a la thei lo chu mak ka ti viau mai.

"Kal ang le..."an inchhung ka luh rual rualin Delancy chuan a rawn ti a,kan inzui chhuak leh nghal zat.

Nileng chuan kan vâk kual a,chauh pawh kan sawi lo,nuam kan ti lutuk ringawt.

Ka phone ka ngaichang reng tak nain a reh vawng vawng lawia,a buai ka ring chuang bawk si lo.

Call nawn ka tum tawh bik lo va,a duh hunah min rawn call ve mai ka ring bawk.