HELLO OFFICER 💞 chapter 3

HELLO OFFICER 💞

Ziaktu: venpuii 

Inchungah chuan kan inzui chho hnak hnak a,ka hnungah a kal a,pheikhai a zang duh fahran lo khawp mai.

Ka room-ah chuan kan ṭhu ta vang mai le,ka lehkha ka zirna ṭhin dawhkan chu ka bawh ar ar a,ka assignment chu a tihdan a sawi mial mial a,ka ngaihthlak leh ngaihthlak loh pawh ka hre lo ve a.

"Chhurhnuhnung ngaithla ve ta che,i ngaihthlak loh te chuan i ti thiam nang,"a ti hluk hluk a,a chair ṭhut lai chawp chuan ka tlawh thlu zawk dawn em maw ni,"Khawvel ram zauah hian i thu lo ber mai awm e,"ka ti nuah nuah a,"I tutor nih a chakawm dawn loh hi le..."a ti a,"Chak pawh ni la i ni lo ang,"ka tih chuan a thaw hak.

A ṭha ti hian min ning se,min hrilh peih lo se,chhuk nal nal se ka ti.

"Ngaithla ṭha mai mai rawh,"a ti a,a thu lohzia hi a hre mawlh si lo,"Oii..anah,"ti a,"Khawi lai?"a rawn tih chuan,"Ka rilru,"ka ti a,"Eng vang chuan?"a ti a,"I thu lo lutuk a,ka rilru a na,ka khawngaih lutuk che a.. bakah mi khawngaihna hi ka ngah ve hrim hrim a,"ka ti a,a hui pap pap mai.

"Tar ki ring, ngaithla ṭha rawh,i rilrua awm ang kha a thleng dawn lo,"a ti a,"Eng nge ka rilruah awm?"ka tih chuan,"Kei aiin i hrechiang zawk,"a ti a,min hmuh tlang vek tum ang hrim hian min en a,ka chil ka lem dawk mai.

Tho hluaiin,"Ka ṭhiante ta ka copy tawhai ang,bakah naktuk ka chawl dawn tho,"ka ti a,a kiai suk a,dawhkana a phone chu lain a chhuak a,ka thinphu rang lutuk chu a na thei hialin ka hria.

Indah felin khumah chuan ka let tawp a,a ngai têin ṭhenawmte nupa an inhnial leh tawh.

Nu Chami'n,"Malsawmdawng nga ti nge Kimkima ṭhianpa tia i save hi hmeichhia anih daih a?"a ti ṭeng chhuai a,khai le a pui dawn e.

"Ka hre nang.."pa Dawnga chuan a ti tim daia,"I hmelchhiat lil lel nen ngaihzawng te chu i nei ve khanglang em maw ni?"nu Chami chuan a ti daih a,a thinrim viau dawn a maw tih lai laiin.

"Ka nei lo reng reng,"pa Dawnga'n a ti leh a,nu Chami'n,"Lungngai suh i inthlahrung ve deuh em maw ni,kei hi chu ka hmelṭhaa hei vang hi ania i ṭhiante pawn,'engtin nge i bum thluk theih,'an tih zel che hi,"a ti a,amah a infak daih nia maw le.

Ka lo muhil daih aniang ka harh leh chuan dar 8 a lo ri tawh a,ka pu ṭhianpa tunuin pasal a nei dawn a,ka kal peih chiah lo nangin ka pu'n min hruai a tum ruh si a,mahse nilenga professor-te hmuh ai chuan a zia zawk tho tho.

Ka phone ka en chuan Rintei message pakhat a lo awm a,"Zanah ka lo kal ang,hrilh duh che ka nei,"tih a ni.

"Lo kal ngei ngei rawh,"tih chu thawn letin ka tho a,ka mu nasa lutuk a,ka lu te hi a na vek theiin ka hria.

Inhnuaia ka chhuk chu ka pi chuan tuk danga a tih ang bawkin min lo be leh siam siam tawh.

"Mate, inneihnaa kal chu i hreh viau em?I pu hian i awm ce loh kha chuan nuam a ti leh dawn der si lo va.."a ti a,ni e.. ka pu hi chuan min duatin min ti hluak hluak lo a, mahse min thlahlel hle thung.

Khawi i lo a chhuah dawn pawhin a theih hram chuan min hruai hi a tum nghal ngei ngei tawp.

"Peih loh pawh a awm chuang lo..nilenga professor-te hmel hmuh reng ai chuan a nuam dawn tho tho a,"nui chungin ka ti a,a lo nui ve hak hak mai.

Dar 1 hunserh anih vangin dar 10 aṭangin ka insiam a, satin kawrfual baby pink ka ha a,high heels var ka bun a,ka sam chu thlah mawl tawpin ka hmaiah chuan make-up tlem ka hnawih a, ka inpeih chu a ni der mai.

Inhnuaiah chuan ka chhuk a,ka pi chuan min lo nuih sen sen a,"I mawi lutuk ka tunu,"a ti a,"Kan kal thri em?"ka tih ngaihna hre lo lutuk chuan ka ti ringawt.

"Aw..kal thei ti ila i pu ṭhianpa-te kha kan nghak lawk a,"a ti ta mai,chhe hei leh kan val senior-a kha a tel ve loh hram beisei phawt mai teh ang.

"Eng nge i ngaihtuah vung vung,"ka pi chuan a rawn ti a, ka phu zawk,ka duh aiin ka ngaihtuahna ka a lo thlawh kual thui tir deuh a ni.

In kawta car ding ri ka hriat leh lek phei chuan ka ding hle hle thei tawh lo,a nghal si, a tel ve mawlh chu ka hlau.

Hlauh ang ngei ngeiin a hmasa berah a lo lut a,coat suit dum a ha a, amah a sang ṭha bawk a,inhmeh tak a ni.

Taka a hmelṭhat thu ka sawi tawh em,a hmel maw,pa tak a ni,a mitmeng a dam dap a,chutih rualin a vawt raih bawk.A hnar ngul lah Mizo mipaah chuan a sang pawl a tih theih,a hmui hi chhah lutuk si loin a pan a,pan uchuak erawh a ni keh chuang miah lo.A pian pawh duhthusam a ni deuh tawp mai.

Ka duh aiin ka la en rei zui a, ka pi'n min rawn biak chuan ka harhchhuak ve chauh tu hriatpui si lohin ka zak hlep hlepin ka hria.

"Mawia nen hian chuan dun kan duh a, motor pakhatah kan leng awm si loah,"ka pu'n a tih chuan ka hawi vut a,ka pu hian eng nge maw a hriat zik zek le.

"Anih te chuan motor khalh la,kan nupa leh in nu nen kan paliin chuang ila,Bawiha-te pahnih hi Bawiha motor-ah chuang ve thung se..."ka pu ṭhianpa chuan a ti ta mai.

Ka chil ka hak ṭhawt thei,ka khuh bawrh bawrh a,fiamthuna chi pawh a ni lo,ka rilru chuan a ti nuah nuah.

"A pawi miah lo,ti ru..kal ila,"ka pu chuan a ti leh a,Chhinga tih mai te chu ka nap ka duh lo a theih loh hi a ni tawp.

Ka hnial ngam bawk si lo, Zoremsanga chu beisei nei deuhin ka en a,"Nia kal ila,"a lo ti daih a,huh.. mihring fapa hi,tiang êm êm hian mipa hi a lo nghal theih a ni maw.

Ka din khawng at lai chuan ka pi'n,"Ka la..."a ti a,ka zep lo,ka lawm hlawl lo.

Car-a ka ṭhut fel rual chuan a start a,min rawn en vang vang pahin,"Nang chu i chhur bawk a,pasal i hmu zo lo ang a,"a rawn ti leh kher a,"Nangpawn i hmu zo bik lo ve chiang e..."ka ti chiam a,lawm loh sa naka laia.

Inneih hunserh a zo a,chaw ei kham chuan Rintei a lo kal dawn vangin haw ka duh thu ka pu bulah ka sawi a,"Zorema pawh khan haw a duh tak kha..."Zoremsanga pu chuan a lo ti leh tawh,ka va ning zozai tak.

"A rual chuan haw mai la..."ka pu chuan a ti a,"Aw le,"ka ti a,a ngai tê têin Zoremsanga rual bawk chuan ka haw leh.Motor-a kan chuan lai mekin phone call ka dawng a,nu Hmingtei Rintei nu a ni.

"Hello nu Hmingte,"ka ti a,dar 6 a lo ri deuh thuak tawh.

"Sangsang,i ṭhiannu nen in awm em?"a rawn ti a,ka bo ang reng,"Awm dun miah nang nga ti nge?"ka ti a,"A college bang a lo la haw miah lo,"a rawn ti a,eng nge maw awmzia,eng vanga tun chen chena in la thleng lo nge maw anih le.

"Aw..nu Hmingte lo mangang lo la,Remremi nen an awmdun aniang kan zawt,"ka tih lai mekin,"Ka zawt tawh an awmdun lo, college pawh a kal lo,"a ti a,a rawn ṭap pur mai.

"Kan phone chhin,"tih pahin call chu ka hang up a,Rintei chu ka call a,a ring quit ṭhak ṭhak a,call leh ka tum lai mekin Remsanga phone chu a rawn ri a,Rintei bawk chu ka call leh a,Remsanga thu rawn sawi vang chuan ka che lai ka tawp chawt.

"Hmeichhe ruang maw?"chu thu chuan ka ti rilah min fan a,ka neih ngai hauh loh hlauhthawnnain min chen chilh zui bawk.