HELLO OFFICER 💞 CHAPTER 13

HELLO OFFICER 💞 CHAPTER 13

Ziaktu:venpuii

Kan mut fel leh hnu pawh chuan ka muhil leh thei mai lo va,ka taksa a za nasa bawk si a,a hreawm bawk si,Remsanga tih harh ka hlau bawk si a,ka awm dan chu a khingbai ka ti mai.

"I muhil thei lo em ni?"ka inleh leh rual chuan a rawn ti a,"Imm..ka taksa hi a za nasa lutuk a,"ka ti a,ka inthlahrung lutuk ringawt.

"Ka lo massage ang che aw,"a tih chuan,"Aih a ngai lo,a reh mai ang, muhil leh tawh rawh,"ka ti a,nui chungin,"Laldangdaite,"a ti a,a tho ta ṭuih ṭuih mai.

"Remsang,a ngai lo,mu rawh i chau ang a tlai tawh a, naktukah hna kal i ngai bawk si,"ka ti a,"A ho lutuk,lo mu rawh,"a ti a,dressing table-a massage oil chu a rawn la a,min massage thlap hnuah a mu a,hepa ka nei hi ka vannei,ka vanneihzia ni tin hian ka hre nawn awn awn mai dawn zawng anih hi.

Ka muhil chu ka taksa an rawn sawi vang chuan ka harh a,"Ka peih lo,"tih paha in lu khupin ka mu ṭha sauh sauh a, morning walk hi chu ka chem kalna a ni lo.

"Nau pai lai chuan exercise lâk ṭhat tur, exercise la ṭha chuan nau pawh an awl,"a ti a,"Naute hian mut a la duh alawm,"ka ti a,ka tho peih lo,dar 5 a pel peh awrh chauh ang.

"Tho rawh le,"a ti a,min tur leh tak sek sekah chuan ka ṭhu nawlh a,min lo nuih sang a,ka beng bu lâwp zawk dawn em maw ni.

Ka tracksuit chu tum burin ka in thawlh a,ka sirah a lo nui tet tet a,ka beng sawk chak tak tak.

"Ka peih lo e..."ka tih chuan nui chungin min kai chhuak a,"Ka lo tho kher a ani,"ka ti bul bul a,min kai chhuak lui tho.

Ka tum bur vang chu nge ni thui pawh thleng loin min letpui leh daih a, inchhung kan luh rual chuan Remsanga nau Mawimawii'n,"In walk a law?Naktuk zingah in walk leh dawn em?Ka lo kal ve duh,"a ti a,a tih ṭhin dan ang chiahin min zui leh chawt a,ngainat loh theih a ni lo reng reng.

"Lo kal ve tawh rawh,"ka tih chuan,"Kaihthawh huphurhawm dun dawn ve..."Remsanga'n a lo ti nuah nuah a,an lo tho kim vek tawh anih hmel.

Inchungah chhoin ka thawmhnaw te ka thlak a, inhnuaiah Mawimawii nen midang ei rawngbawl kan pui a,kan titi bawrh bawrha,a nuam ve takzet.

Hun a liam ve bek bek zel a, ka nau pai pawn thla 7 hmel a hmu ve tawh a,in fit loh sa naka laiin ka rih belh a,kan kal ve phei hi chu che ṭuih ṭuih tih zawng zawng ka nei kim vek a,mut ka duh tial tial emaw tih mai turin ka mu hnem a,mang te pawh a ang rum rum hial mai.

Ka nau pai lah chu ka a fual lutuk a,dawm a ngai a,ka chet vak vak an phal lo a,min khap deuh sek reng a,chet luih ve ngial ka tum pawn min khap hneh lutuk tlat.

Ka muhil chu ka pum na lutuk vang chuan ka harh hlawl a,ka mutna chu a huh vek a, ka tui bawm a kehin ka hria.

Ka bula mu Remsanga chu thei leh thei lo hian ka sawi a,a rawn ṭhu nawlh a,ka lo awm dan a hmuh rual chuan,"I ṭha em?"a ti a,"A na lutuk,"tih bak sawi tur dang ka hre lo.

"Nu,pa,"a ti a,"Damdawiinah kal ang aw,"tih leh min pawm a rual a,a na lutuk chu awm ngaihna reng ka hre lo.

"Eng nge a Bawiha?"ka nu'n a tih ri pawh ka hria a,"Ka hre lo nu,a pum hi na a tia,"a ti a,"Ka tui bawm,"thei leh thei lo chuan ka ti a,ka nu'n,"E khai hmanhmawh ang u khai,"a ti a,kan room-ah chuan tlan lutuin naute thil tur kan lei te chu a rawn la chhuak a, car-ah chuan min luhpui a, Remsanga'n car a khalh a,a hmaah ka pu a ṭhu a,a hnungah ka nu'n min ṭhutpui thung a,car dangin ka pa,ka pi leh Mawimawii ten min lo zui a,ka pu'n ka chhungte a be nghal maelh mawlh mai.

Damdawi in kan thleng a,nau neihna room-a min hruai luh dawn thlengin Remsanga chuan ka kut a vuan a,"Hlauthawng suh aw, hetah ka lo awm ang,"a tih chuan min thlamuan takzet.

A na lutuk a,ka chau tawh bawk si,san ka pe ṭha thei lo a,ka mit ka chhing ngawt ngawt a,ka mut a rawn chuuak em em mai bawk si.

Muhil lo tura min kohna te pawh ka hre vuai vuai a, ka chau tawh takzet.

"Ṭang rawh aw,vawi khat chiah dan han pe leh teh le, zam lo la,a lo chhuak ṭep ania,"nurse pakhat chuan ka bula lo kal pahin a ti a,a tawpnan sa ka pe leh a,"A lu a lo lang tawh,"an tih ri chu ka hria a, a tawp nan tak tak san chu ka pe leh a,naute ṭap ri ka hre ta chu ka thla a muang huai a,ka hlimzia chu tuna ka na tawrh ai hian a nep zawkin ka ring lo.

"I ti ṭha lutuk aw, hmeichhia a ni e,a hmelṭha lutuk,"an ti a,min buaipui mawlh mawlh a,nau neihna room aṭanga min nawr chhuah leh lai pawh chu ka hre mang lo reng reng.

Ka lo muhil a,thawm ri nak nak a awm vang chuan ka meng a,"A lo harh tawh e,"ka nu'n a tih chuan muang changin ka ṭhu a, Remsanga'n min lo pui thuai a, ka hawi kual chuan ka pu'n naute chu a lo pawm a,min rawn en pahin min pe a,ka han pawm chu engtin emaw hian ka awm.

Ka sawifiah thiam lo,ka hlimna hian van a tawng hialin ka ring a ni.

"A duhawm zia hi,ka lawm lutuk aw,"Remsanga'n a rawn ti a, ka lo ṭah nuih ti tih.

Ka pu'n,"I pi kha zawng la awm ve se aw..."a ti vawng vawng a,ka van lainat tak.

Ka pi mai ni lo Rintei pawh la awm ve se ni tur.

Ka nu leh pa an lo kal hnai a,"Hnute pe la,"an lo ti a,harh zawkin hnute ka pe a, thla sariha piang mah ni se kan vannei a,a tlei khawp mai,a ma tawkah a khal ve ṭalh a,"Eng nge a hmingah kan phuah ang?"nui chunga ka tih chuan," Ramdinmawii,ni rawh se kan lo ti a,"ka pu'n a lo ti a,ka hnial lem lo."Bawihte,"tih pahin ka nu'n min kuah a,a nui var var mai.

Nu han nih takah chuan nu dinhmun pawh ka hre chiang ve takzet.

Nu te tana fate lo hlutzia tur hi aw..ka ti,an hmangaih tur ziate thlengin,pa te pawh an bang bik lo na chungin nu leh fa inzawmna hi a thuk bik a,thla tam tak chhung min pai a,na tam tak tuarin min hring a, misual tak tak,rukruk hmang,buaina siam ching te pawh hi an nu te tan chuan hmangaih loh theih an ni lo, fate chu an sual poh leh kan hmangaih a maw tih mai tur a ni.

Miin an fate chungchang ṭawngkam deng khawng tak taka an sawi lai pawhin nu tan chuan an fate an hmangaihna a sawi danglam phah ngai hauh lo te hi mak ka lo ti ṭhin kha a nia,mahse tunah chuan ka hrethiam tawh.

Fate tan chuan hming chhiatna te, hmuhsitna tin reng tuar an lo ngam dawn a ni tih te chenin ka hre thar awn awn bawk.

Ni 3 damdawi ina kan awm hnuin kan chhuak a, ka ril a ṭam deuh vangin ka bula ka fanu leh ka pasal mu chu thawh sanin inhnuaiah ka chhuk a, eitur ka la zo inchunga chhoh leh mai ka tum chu Mawimawii'n min lo au ding a.

"U Sangsang, engtin nge hmangaih tu hi i thiar hran ṭhin?"a lo ti mauh mai a, ka nui hak mai, chutah ti hian ka chhang a.

"Hmangaitu dik tak chuan maw i hlimna a ngai pawimawh ang a,mahse a duh ber chu i ṭhatna leh i himna a ni thung ang,chhiat phah vek dawn pawh ni se i ṭhatna tur anih phawt chuan engmah tih hreh a nei ngai lo ang,i ṭhatna tur anih phawt chuan i harh chhuah theih nan kawng thim tak dai tur pawn a kawh hmuh ang che,mahse chu kawng thimah chuan i vawn tur leh i rinchhan turin i kiangah a awm reng ang,"tiin.

Bu nghauh nghauhin,"Ka lawm e aw,"a ti a, keipawh room-ah chuan ka lut leh a.

May thla tawp a ni a, fur in ṭan tur boruak chuan ka hun tawn meka ka hlimzia min hrilh nawn tluk tluk a, ka fanu ka sira tui taka muhil leh ka pasal muhil chu ngun fe hian ka thlir a, ka thlir ning thei ngaiin ka ring lo.

Ka khawvel chu an niah hian a inṭan ang a,an ni ah bawk a tawp leh ang,an hlim chuan ka hlim ang a,an lungngaih changin an in hnemna nih ka tum fo ang,ka chhungkua an ni miau a ni.

                      A TAWP TA