HELLO OFFICER 💞 CHAPTER 10

HELLO OFFICER 💞

Ziaktu:venpuii

"Lo kal ru,chaw ei phawt ila,"Remsanga nu chuan a ti a, ka kutah rawn vuanin,"Lo kal rawh Bawihi,"a ti a,choka lamah min hruai a.

Chokaah chuan hmeichhe pakhat hi a lo che sawk sawk a,"Tu nge i hming?"a rawn tih chuan,"Lalnunsangi,"ka ti a,ka zak tlat.

"Engtia rei nge in inzui ve tawh? Engmah lah chu kan hriatpui der si lo cheu a,"a ti a,ka sawi hreh tlat,kar khat pawh kan la inzuiin ka hre lo e a.

"Ah..a la rei vak lo,"ka ti a,nui chungin,"Kum engzat nge i nih?"a ti leh a,"Kum 23,"ka ti a,min biak tak seuh seuhah chuan tlemin ka nel ve ta deuh.

Chaw kan ei a,min be bawrh bawrh a,ka rin phak bakin an fel.

"Chaw ei khamah kan va dah che ang a,zaninah palaiin an rawn zui nghal ang che,"Remsanga pu chuan a rawn ti a,ka chhang lem lo.

An sawi ang ngeiin chaw ei khamah chuan min va dah a,ka nu leh pa leh ka u te pahnih pawh an lo awm a,ka inthlahrung tak tak a ni.

An awm lai chuan engtin teh ual min ti lo a,an haw hnu chuan min zilh malh malh a,midang chu ka hlau miah lo,mahse ka pu la ṭawng ve miah lo chuan ka ngaih a ti ṭha chiah lo.

Rei ngial a ngawih hnu chuan min rawn en pah hian,"In inruk dawn tho tho te chuan min hrilh ve ta che,"a rawn ti heu mai.

"Ka hrilh che chuan inruk i phal nang,bakah tumah chhungte phalnain an inru ngai lo,"ka ti a,eng nge maw awmzia ni.

"Chu pawh ni se,ka tel ve chak alawm,"a rawn ti a,teh daih chuan,a thinrim berin ka ring ania, mahse a ni lo nasa a ni.

"Eng nge awmzia?"ka pa chuan a ti a,ka pu chuan nui chungin,"I chhur viau a maw ka tia,tiang tihna chang te i lo hre ve a,a va vanneithlak letling ve,"a ti a,ka bo map mai.

Chutah nui chung hian,"I duh phawt chuan i nei dawn nia,"a ti ta a, khai leh...a phal,a phal chiang alawm.

Ka haw zan chuan ngaidam dilin palai an rawn tir a,a hnu lawkah palai pangngai an rawn lang bawk.

Ka pu leh a pu an phur bawk a,a kaw duak duak mai,kan inneih ni atan chuan May ni 12 an ruat a, inbuatsaih nan kar 2 bak kan nei tawh lo.College pawh zawm tawh loin ka bang bawk.

Naktukah hian kei,Remremi,ka monu te nen mo kawr kan en dawn a, ngaihtuahnaah Rintei a rawn thar a,pasal kan neih hunah chuan ṭhiana in hman ve ve kha kan tum ania,mahse...a rem ve tawh si lo.

Ka tun hun te hi min han hmuhpui ve thei se ni tur, ka phone a rawn ri a, ka en chuan Remsanga a lo ni.

"Hello,"ka tih rualin, a ngawi vang vang a,chutah le,a rawn zai ta al al mai,Lalṭanpuia Tochhawng hla phuah,'Min tuah rem thuai se,'tih chu a sa a,a zai laklawh lai tak chuan,"U i va bê nasa ve,a muttheih miah loh ania aw,"a nau Mawimawii chuan a rawn ti a,ka va han nui nasa mai mai tak.

"Mi inlak romantic lai laiin Lalrinmawi,kal nal nal rawh,"a ti hluk hluk a,ka nui khur char char.

A chhuak fel ta aniamg,"A nalh em?"a rawn ti a,ka nui hak,"I bê a mi?"ka tih chuan,"I thaw fresh anih chu,"a rawn ti ve ngei a,hepa hian ka zia a kai ve telh telhin ka hria.

"I la mu dawn lo em ni?"ka tih chuan,"Ka mu reng alawm,"nui chungin a ti a,"Val senior nghal sawt lutuk loh tur aw,"ka tih chuan,"Tlangval ka ni tawh lo,pathlawi nakin lawka nupui nei tur ka nih hi,"a rawn ti pang pang mai.

Rei ngial kan inhnial leh hnu chuan call kan ti tawp a, keipawh ka muhil zui ve nghal mai bawk.

Ka harh leh chuan khua a lo eng ut tawh a, ka thawh chhuah hnu chuan ham bai baiin inhnuaiah ka chhuk a, ka pu'n an in aṭanga pasal nei tura min tih tlat vangin an bulah ka la awm ve reng bawk.

Chaw ei kham veleh inchungah chhoin ka insiam a,ka phur lutuk a,ka thak sep sepin ka hria.

Ka insiam zo, Inhnuaia ka chhuk leh chuan an lo awm kim ṭhap tawh,"Call i va la thei lo,"Remremi,Remsanga,kan monu leh u Puipuia'n an lo ti a,ka silent daih alawm a va zia lo tak.

"Ka silent daih a,"ka ti a,ka inthlahrung lutuk ringawt.

"Imm...anih chuan i inpeih chuan kal ila,"Remsanga'n a rawn ti a,"In lo kal ve dawn a mi?"ka ti a,"Kan thlah ang cheu,thil tih lawk tur kan nei a,"a ti a,kan inzui chhuak dam dam.

Mo kawr kan en kual a,a to hlawm ṭak ṭak khawp mai,lei ṭul ka tih teh chiam loh vangin kan hawh dawn a,kan en kual lai chuan ka tum loh lutuk ka hmu a,dawr chhungah chuan Wendy leh hmeichhe pakhat an lo lut ve a,min hmuh rual chuan a mit ti zim leh san mai.

"Hei hi a nalh tawp,"tih paha Remremi lo ken chu ka en vat a,"Rem,a puk mah mah i ti lo em ni?"ka ti a,pakhat ka hmuh tirh phat aṭanga ka mit la tu chu kawh pahin,"Hei hi,"ka ti a.

A ban chu lase a ni a,malpui lai vel thleng a tight a,a bak zawng a awlrh thla a,a ban a,a lase an hman qng chuan a awm an chei bawk,a ni chuai lo a,a simple reuh lutuk.

"Oii...mo kawr hak ve tâk veka khatiang, ṭenghneng e..."min ngaihnep hmel deuh hian Wendy chuan a rawn ti a,ka chhang lo,a dawr nghâktute erawh an lawm chiah lo tih an hmel aṭang chuan an lawm choah lo tih a lang.

Remremi chuan min rawn zawt a,"Remsanga ex,"ka tih chuan a ner nawk mai.

"Mawiah,Sangsang i inhmeh dawn lutuk,i mit hi chu aw...a nalh thlawt,va ha chhin rawh,"a ti u Nunui pawn,"Ni e..va ha rawh,i inhmeh dawn lutuk,"a lo ti ve a.

Dawr nghaktu nula leh Remremi chuan min lo pui a, ka inen chuan nalh ka inti ve takzet.

Ka va chhuah chuan,"Ka duh aiin ka pian a pho,"ka ti a, Remremi'n,"A nalh daih zawk,"a ti a.

"Ni e...i pian a nalh e...nang chu,"u  Nunui'n a ti ve thung a,dawr nghâktute pawn min fak sap sap a,Wendy ṭhiannu'n,"Oii...i tumtawi mah mah,i pian ang hak chi a ni lo,hei ka ṭhiannu te ang pian hi a ngai,"ner nawk nawk pahin a ti a, ka ngawihsan mai mai laiin,"Oii...i ṭhiannu ang khan ka ṭhiannu hi awm se i ti deuh tihna em ni?In pahnih a in make-up layer chhah turu dan kha,tuiin theh ṭhawt cheu ila,in rawng kha a da hawk thei ang a,"a ti a,u Nunui leh dawr nghaktu te an nui hak mai.

Ka phone a rawn ri a,ka bag aṭang chuan u Nunui'n min lo phawrh sak vat a,"Remsanga,"min pek pahin u Nunui chuan a ti a,Wendy a lo hawi zawk mai.

"Imm..."ka tih chuan,"Hei kan tih tur kan zo chiah a,in inpeih tawh em?"a ti a,"Imm...kawr hi ka ha chhin mek a,"ka ti a,"In awmna lo sawi la,kan lo kal ang,"a ti a,kan dawr awmna chu sawiin call kan ti tawp a,"An tih tur an zo tawh a,an lo kal dawn,"ka ti a, Remremi'n,"Lo kal rawh se, nangpawh ti khan la awm rawh,i inhmeh zia hi hmu ve reng reng teh se,"a ti a,ka nui hak.