Moonlight chapter 6

Moonlight chapter 6

By:venpuii

Kar thum dawn teh meuh kan exam hnu chuan kan zo ve hram a,ka awm awl dar dar tawh khawp mai.

Ka mut dar dar lai chuan Raphael-a phone call ka dawng a,ka pick rualin,"Duhawmnu,"a rawn ti nghal a,ka lai leh tawh.

"Mawla,mi hi bawl tum ve ziah suh,"ka ti khar khar a,a lo nui huk huk mai.

"Kan ṭhianhoin kan ride dawn a, ka lo sawm dawn che a nia,"a rawn ti a,"A chi nang...in ṭhianho anih chu,"ka lo ti a,an ṭhianho thil tiha lo va inhnamhnawih chu ka tih loh tawp turah ka dah hmiah.

"Hannah-i leh Feli'n 'a lo kal ve loh kan ride lo ang' an ti,"a rawn ti zuah zuah a,"Zothanpui,i ti awm ang lo e..."ka ti hap a,"Duhawmnu,"a rawn ti teh daih a,ka va han dang chiang tak.

"Ka lo sawm dawn che ania aw,"a ti a,ka chhan leh hmain a dah daih a,thaw hakin inhnuaiah ka chhuk a,ka nu leh pa chu an lo titi a,"Nu,pa, zâninah kan ride dawn a,ka kal ve dawn ania aw..."ka tih chuan ka pa'n,"Tute nen?"a lo ti a,"Ka ṭhiante nen,"ka ti leh a,"Delancy a tel dawn em?"ka nu ve thung a ni.

"Dawn lo e,"ka ti a,"Bialpa i nei em ni?"ka pa chuan a ti a,ka lu ka bu nghut nghut a,an phal pawh ka rin tawh loh laiin,"Va hawi harh ve rawh,i chut ang tih te pawh a hlauhawm,"ka pa chuan a ti ta hlauh a.

Inchungah chuan tlan chho lehin ka insiam a, ka inen mial mial lai chuan ka phone a rawn ri a, ka en chuan Raphael-a phone call a ni.

Ka pick rualin,"Ka awm tawh aw,"a rawn ti a,"Ka lo kal,"tiin ka hang up zui a,sitting room lama ka nu leh pa ṭhu pawh chu be leh ta lo chuan ka tlan chhuak a.

Gate bula min lo nghaktu lam chu ka pan thuai a,a bul ka thlen rual rualin min lo ban vat a,ka biangah fawp zeuhin helmet min khum tir a,min en leh vang vang hnuah,"Duhawmnu,"tiin helmet glass chu a kuai thla a,a hnungah chuan ṭhuin kan tlan chhuak zui a.

A kut pakhat chuan ka kut a rawn la a,a kawr chhungah a dah lut ve rawk a,a vawt aniang chu a phu zawk leh nghalin ka hria.

Kawng lakah a ṭhianten min lo nghak a,Feli leh Hannah-i pawh an tel ve,"Racing naah kal ang u..."Dennis-an a tih chuan an pawm tlang aniang an lo aw dual hlawm a.

Midang a tlan hmasak tir hnuah a hnuhnung berah kan tlan a,"Thil ka zawt ang che aw,"ka hriat chhuah thut vang chuan ka ti a,a lo aw ve mai.

"Engtin nge lollipop kha chupa chyps cherry flavour ka duh tih i hriat?"ka ti a,nui nghawr detin,"I fawp nasa thei e..."a ti a,a nui aniang a taksa a nghawr dat dat mai.

"Chu min lo van chîk awm,"nui paha ka tih chuan,"Khami zan aṭang khan,"a ti a,"Engtik?"ka lo ti leh thuai a,"I ke ka tih nat zan aṭang khan,"a ti a,"Nga ti?"ka ti leh a, ka hre chak miau a ni.

"Ka ngaihtuahnaah i awm reng a,"a ti a,a ngawih vang vang hnuah,"Tu emaw min hriatchhuah tir bawk a,"a ti leh a, ka zawh chhunzawm tawh lo.

"Kan thleng e,"a ti a, ka hawi chhuah nak chuan bike tam zet hi an lo ding a,a bengchheng lutuk ringawt.

An hmaah chuan hmeichhe in ha bul zet hi a ding a,flag a vai rual chuan bike-ho chu chak deuh deuh hian an tlan chhuak zui a,a bengchheng lutuk chu hreawm tham a tling.

"Wow,wow,wow,zahna,khaw nge zahna?"tih riah chuan Hannah-i leh Feli chu an ner sawk a, mipaho an inhum ruh ran bawk...

"Raphael Zothanpui,kum thum chauh a la liam tih hi i hria em?Nangmah vangin mi tu emawin nunna a chân tih te hi i hre ve em?"a ti leh a,chu thu chuan ka beng a verh ngâng mai.

Raphael-a chu ka en a,ngawi ngalin a hmaa mi chu a en reng.

"Hei tunge ni? Hmeichhia maw?Zawnga nangmah vanga ka farnu ka chân laiin hmeichhe dang i lo buaipui leh hman a maw?"a ti leh a, midang ho chu an thinrim hmel lutuk.

Raphael-a hmelah erawh engmah a lang lo va,thil ngaihtuah mûk hmel a pu thung.

"Thih i duh loh chuan thlawk bo rawh,"Dylan chuan pan hnaih pah hian a ti chher chher mai.

Chu pa pawh chuan melh khui khui pahin,"Zep in la tum em ni, in ṭhianpa vangin ka farnu Dindini a thi tih hi,"a ti a,eng vângin nge chu thu chu a sawi reng le tih chiah ka ngaihtuahnaah a awm.

"Laldinsang,ngah nge maw chu pawh chu i sawi ve sek le... Raphael-a thiam loh anihna a awm lo,"Feli chuan a lo ti tun tun a, engmah hrethiam ve ta lo chu ka lo ngawi reng.

"A tawpna a ni lo aw,"min rawn en zawk pahin a ti a,a kal nal nal mai,"Raphael,Dinsanga chu i hriat chian kha aw,"Edmond chuan a ti a, ka hrethiam lo leh zual.

"Va hawpui phawt mai ta che,"Dylan chuan min en pahin a ti a,î hê lo chuan Raphael-a chu ka kai sawn a,a bike-a kan tlan lai pawh chuan kan inbe lo a,tlema ngaw lai deuh kan thlen chuan ruah a rawn tla ta mai a,a sur hnem si a,kan huh deuh hnuang tawh.

Bike a din rual chuan ka hawi chhuak a, Raphael-a chuan,"In teah sawn a sur ban hun nghak lawk mai ang aw,"a ti a,chhuk sawk sawkin kan tlan lut a, tapchhakah chuan ṭhuin mwi chhem ka tum a,ka chhem thiam lo tih ka hre ve chiah.

"Ka lo chhem ang,"tih pahin Raphael-a chu a rawn ṭhu hnai a,a chhem alh har lo,"Tunge Dindini?"ka tih rual chuan a che lai a tawp chawt a,min enin,"A ho lutuk tu mah a ni lo,"a ti a,a sawi duh tak tlat loah chuan zawt zui loin ka ngawi rân reng a,thawk hak pahin,"Ka bialnu hlui ania, mahse a thi tawh..."a ti zuai raih mai.

Zawh zui zel chi a ni tawh lo,a hmel a tak ngul a, ka ngawih tak reng vang chuan min banin a mal chungah min ṭhut tir a, ka kut chu nghet zet hian a vuan a, tih ngaihna vak ka hre lo.

Ruah a han ta maw tihah chuan in lam min panpui leh a, in kawta kan din hnu chuan engmah sawi lo va luh mai ka tum chu min vuan leh rihin,"I thinrim em?"a ti a,lu thingin,"Rim lo ve,kal tawh rawh,"ka ti a,min nuih luiin,"Ka thlen veleh ka lo bia ang che,"tiin ka hmuiah a fawp a,a tlan chhuak chu ka enzui reng.

Eng chiah nge maw thleng le.... ka tih rauh rauh hnuah inchhung ka lut a, ka nuin min lo be luam a, ka chhang tawi tek tawk hle...

Room ka luh rual chuan intifai thuak thuakin ka mu lum hlun a, ka ngaihtuahna a chawl meuh lo.

Ka phone ringtone ka hriat rual chuan thaw hakin ka pick a,amah a ni,"Ka thleng tawh aw..."a rawn ti a,"Imm..."ka ti ringawt sawi tur a vang lutuk.

"Muttui,"a ti a, sawi tur a hre bik vak lo anih hmel.

"Muttui,"tiin call chu kan ti tawp a,a zo der,eng chiah nge thleng tih hriat chak nain ka khat a,ka zawt ngam tawh der silo.

Khaw var dawn hnaih chuan ka lo muhil ve hram a, ka harh leh chuan khua a lo eng ut tawh.

Tho chhuakin college kal turin ka insiam a, vawiinah kan result a chhuak dawn a, naktukah closing function kan hmang ang a,kan chawl tawh dawn bawk.

Ka phone ka en chuan Raphael-a message emaw a call pakhat tê mah a lo awm lo va,amak ka ti viau mai.

Nidang chuan a call riah ka harh ngei ngei kha a nia,mahse a call chu dawi loh a message tak ngial pawh a awm lo.

Ka lunghnûr dawn dawn a, message chu thawn hmasain chaw ei khama ka en leh pawh chuan a lo la seen lo,amak ka tihna chu a zual telh telh bawk.

Dar 9 rik dawn tawh pawha a la seen theih loh vang chuan ka pa rualin ka kal ta ngawt a, ka thinrim deuh hlur bawk.

College gate bulah Delancy'n min lo nghak a, Raphael-a nena kan kal rual lo chu a zawhna pakhatna a ni nghal phawt.

Nizan lama thil thleng ka sawi mial mial laiin,"Valentina,"tih ri ka hria a,ka hawi kual chuan Raphael-a ṭhiante chuan min lo nuih heu hlawm a,amah a tel chuan loh vang chuan ka pan hnai a,"Khaw nge Raphael-a?"an lo ti a,zawh ka tum ve chiah a.

"Ka hre nang, kan lo kal rual lo, message pawh a seen thei lo,"ka tih chuan Edmond chuan,"Vawiin te chu August ni 7 ania, vawiin ni angah chuan Raphael-a leh Dylan college an lo kal ngai lo,"a lo ti a,midang pawh chuan,"Ni tak,"an lo ti a,"Nga ti nge?"ka tih chuan an hriat loh thuin min chhang a,rei vak lo kan inbiak leh hnu chuan ka kalsan a, Delancy chuan,"Tinge niang le?"a lo ti a,chu tak chu keipawh ka zawhna a ni.

Result a chhuak a, keipawh 1st ah ka pass a, Delancy pawh chu ti tho.

Raphael-a erawh 2nd ah a pass thung a,biak ka tum ngat ngat a, switch off a inti zel a,ka mangang takzet.

Zan dar 11 vel thleng pawha a la lak theih loh vang chuan Dylan ka call a,a ni erawh a tlang hram a,a ring rei ngang mai.

A la tawh dawn lo em maw ni ka tih rilruk tawh laiin a rawn pick a,"Hello,"a rawn ti chiah chu zawhna hlirin ka khat.

"Muangchangin muangchangin,"a rawn ti a,ka la insum thei meuh lo,"Raphael-a khawiah nge,a awmna i hria em?"ka ti a,"Aw hria e,"a ti chiah chu,"Min hruai rawh," ka ti ṭuau a,thawk hak pahin,"Aw le,"a ti a,call chu ti tawpin thawmhnaw lum ka inbel a,gate bulah chuan ka lo nghak a,a lo thleng har fû mai.

Rei fe ka nghah hnu chuan a rawn thleng ve hram a,"Eng nge thleng min hrilh vek rawh,"ka ti a, engkim a tir aṭanga hriat vek ka duh.

"Lo chuang la,ka hrilh ang che,"a ti a, ṭha deuh chuan ka chuang a,a tlanchhuak a,"Khawiah nge a awm?"ka ti a,ka ṭap ṭuau theiin ka hria.

"Dindini thih cham a nia, vawiin ni angah chuan nilengin a thlanah kan awm a,tlaiah ka hawsan ṭhin a,a ni chu zanlai thleng a awm ang,"a ti a,a bak engmah a sawi lo,bike a din rual chuan ka chhuk a,"Khawiah nge?"ka ti a,hmuh vat vat ka duh,chu chiah chu ka hriat chhun a ni.

Kal mai ka tum chu,"Vawiin hi a kum thumna a nia,"a tih vang chuan ka ding leh chawt.

"Raphael-a hian a vawi khat nan ngaihzawng a nei a,chu chu Dindini hi a ni,in mizia hi a inang lutuk a, hmeichhe fel tak a ni a, Raphael-a nen pawh an inhmangaih hle ṭhin.Class xii kan nih kum kha a ni a,zankhat kan ride naah khan midang nen kan intibuai a,a sual pawh kan insual nasa...Feli,Hannah leh Dindini kha hmun himah an awm turah kan ngai a,mahse kan lo tisual a ni,mipa pakhat khan chemte a lo keng a,Dindini kha a lo va pan a,amah Dindini pawh khan engmah a lo hre lo,kan hriat meuh kha chuan Dindini kha a lo vit tawh a, damdawiin kan panpui laiin a chat thla a,khata chin kha Raphael-a hian anchhiaa inngaihna chin a nei a,Dinsanga lah khan a lo mawh puh ve reng bawk si a..."a ti a.

A sawi zawm leh a,"Khata chin kha a nui hmel hmuh tur a awm ngai tawh lo,mahse i lo lang a,kum thum dâwn kan lo bei tawh a nui hmel hmu tur hian...mahse nang hian kum tam tak kan lo beih tawh chu thla rei lo tê chhungin i hlawhtlintîr a,chhanna i pek zana a hlim zia kha i hrethiam kher lo ang,a nuna i lo lut hi ka lawm takzet,i kianga a hlim ang hian tu bulah mah a hlim ngai lo Dindini bulah tak ngial pawh,"a ti a, Raphael-a hmuh chakna hlirin ka khat ka ngai takzet.

"Kan lawm lutuk ania aw,a nuna i lo luh vang hian,"a ti leh a,min nuihin,"Han kal rawh,khi laiah khian i hmu mai ang,"a ti a, lawmthu hrilh sawk sawkin bak lêngin ka tlan a.

Thlan pakhata mipa ka mipa hriat ṭhan êm êm ruang âm ka hmuh chian ka lawm lutuk a, ka ṭap lo chauh, a phun sep sep vang chuan ka pawh duh mai lo va,a ṭawng ri hre phaka ka awm chiah chu a tana ka hlutzia ka hre awn awn a ni ber.

"Dindin,kum thum a liam ta, enteh min lo thlir ve ṭhin em?min lo thlir chuan ka hun tawn hi i hre ngei ang.Hmeichhe pakhat ka tawng a,khawvela thil hlu tinreng pawhin ka tana a hlutna hi an hen zo lo,i hria em i chanchin ka hrilh loh vang khan a lungawi lo lutuk a, tunah ka la be bawk si lo, min ngaihtuah tawh ngawtin ka ring,"a ti a,ka insum thei tawh thlawt lo.

Ka pan hnai a, ka kuah ta ringawt,"Valen, Valenty,Mate,"a ti a, ka kuah nghet sauh sauh a,ka bula a awm reng chung pawh hian ka ngai lutuk.

"Call i la thei si lo va,min ti hlauthawng lutuk,"ka ti a, rawn inherin ka kawngah a kut a suih a, ka nghawngah chuan a hmai a phum a,"Tu nge lo hruai che a?"zawi tê hian a ti a,"Dylan,"ka ti hap.

Rawn dak chhuakin ka hmuiah a rawn fawp a,ka chhang let ve thuai bawk min thlahin thlan lam chu min hawipui a,"Dindin, amah hi ania,"a ti a, ka kut chu nghet deuhin a vuan bawk.

Thlan lung nghen chuan a ṭhu a,a mal chungah chuan min pawm a,a ngaqih rauh rauh hnuah,"Dindini'n min kalsan hnu kha chuan ka nun hi rohsan tawh ang maiin a chul a,zan thim ang mai hi a ni,"a thawk ham ham hnuah,"Kha ka nun rohsan tawh ang mai leh thim chhah tak zan ang maia thimah eng a rawn lut a,chu eng chu thla ang maiin a eng a,a rilru thatna,a mize duhawm takahte chuan ka inrin lawk hma hauhin ka luangliam a,ka khawvel thim mupah chuan êngah a tang a,chu hmeichhe duhawm leh ka khawvela thla awm chhun chu nangmah i ni,Valenty,"a aw chu a ring hran lo mahse dar ri ring tak ai pawhin ka bengah chuan a chiang hle thung.

"Ka neih chhun i nih hi,min kalsan suh aw,ka khawvel eng hian min kalsan chuan ka â thei mai ang,kaltir che ka phal tawh lo,"a tih chuan leh hawiin a biangah ka khuap a,a hmuia fawh zeuh pahin,"Ka kalsan lo ang che,kalsan tur che pawn min lo ti eng ang mahla tlawm huam tak meuhin ka zui zel ang che,"ka tih chuan nui sukin min pawm tha a,a awmah min kuah bei hlun a.

"Khawvela thil zawng zawng hian awm chhan kan nei vek a,he khawvela ka lo awm ve chhan chu nangmah hi i ni ngei ang,"a ti sup a,chu a thusawi mawlh mai chuan ka rilru a luah a,ka ngaihtuah zui char char a nuam ka tiin ka hlim takzet.

"Haw tawh ang hmiang,"a rawn ti leh takah chuan ka tho a,rawn tho vein ka darah a rawn kuah a,a kawngah kuah letin min kalpui a,a bike bul kan thlen chuan a helmet a khum a,a hnung chu beng thakin,"Lo ṭhu rawh le..."a ti a, ṭhu tharhin a kawngah ka kuah a,kan in thleng chuan min thlah leh a.

"Muttui,"tia kal mai ka tum chu min vuan lehin ka hmuiah a fawp leh a,"Duh loh hi i har ṭhin,duhawm lutuk nu,"a ti a,ekhai ekhai he mihring hian min ti lai chhia va a ni, love dictionary awm ngat se chuan ka dah ve duh hrim hrim a awmzia etawh a nawi viau thungin ka ring.

"Ka lo riak dawn,"a tih chuan ka harh zawk,"Chi nang,"rang lutuk chuan ka ti a,a nui huk huk mai,"Ka fiamthu anih kha,muttui aw,"tiin ka kawngah a kuah a,min fawp leh vang vang mai.

A tlan liam ka thlir hnu chuan thawm dim deuhin inchhungah ka lut ṭham ṭham a,ka chhungte an harh lo hlauh.

Ka room ka luh rual chuan ka mu thawk a,ka tal tawp tawp,"Duh loh hi i har ṭhin, duhawm lutuk nu,"a tih ri mawlh kha ka bengah a cham leh tawh.

Ka muhil thei mai lo leh nghal a, zahthlak hian a.

Ka muthilh ve meuh chuan dar 4 a pel var var tawh.Ka phone riah ka harh a,ka en chuan Raphael-a a nih ka rin laiin Delancy a lo ni,ka pick vat a,"I inpeih tawh em?"a rawn ti a,"Nga tan?"ka lo ti hê haw a,vin deuh hian,"Amak e...kan usher dawn vawiinah 6th sem thlahna hun kan hmang dawn..."a rawn ti a,ni tak maw...

Ka tho sawk sawk a,ka intifai thuak thuak a,ka dark circle lah chu a lang chiang em em leh nghal Zothanpuia vang vek.

Ka inpeih hnu chuan chaw pawh ei lovin Delancy te in lam ka pan a,a lo inpeih leh vang tawh.

Kan tlai deuh tawh vangin taxi kan la a, kalkawngah chuan nimin chanchin ka hrilh zung zung a,a lo bu nghut nghut a,"Ka van khawngaih,"a ti leh ṭhin.

Ka phone a rawn rik vang chuan ka en vat a, Raphael-a a lo ni,"Morning duhawmnu,"a rawn ti a, hepa hi chu aw....

"Taxi-ah kan chuang a, Delancy nen kan usher dawn a,"ka ti zung zung a,"Ka kal peih lo asin le..."a ti a,"Lo kal lo la,"ka tih hmuk lai chuan,"Chi nang ka hmu duh che alawm,"a ti leh lawi sia, kan dah hnu rei lo teah college kan thleng a,hall chu panin kan tlan a, kan thlen chuan a ṭul ang ang kan ti a,Felix-a kan semester a miin min biak mek laiin Delancy chuan min rawn sik hlawk a,ka hawi chhuah rualin Raphael-a te ṭhianho ka hmu nghal zat.

"Zanin eng nge tih i tum?"a tih lai mekin Raphael-a chuan ka darah a rawn kuah thak a,"Tunge a?"a ti a,Felix chuan,"I bialpa em ni?"a rawn ti a,ka chhan hma chuan,"Ka duh leh ka ni ang a, ka duh leh ka ni lo ang,mahse ka duh a,min duh bawk a,chuvang chuan kan ni,"a ti a,min kaisan daih.

Hepa hi a thik chiang lutuk.Ka khik vur vur lai chuan,"Ûmmm nang hi hrem deuh i ngai,"a ti a,a ṭhiante leh Delancy an lo nui hak hak.

"Lo va kalsan teu in uih,"a ti hluk a, nui kur kur chungin an kalsan a,"Ti nge kha tia i tih kher a?"ka tih chuan,"Hrem i ngai,"a ti a,"Hrem ka ngai bawk lo aw,nangmah vangin nizan pawh ka mu ṭha thei lo,"ka ti hlur a,"Nga ti maw?..."a tih chuan ngaihtuah mang loin,"Ka ngaihtuah char char che a lawm,"ka ti a,"Min ngai em ni?"a tih leh chuan,"Ngai e..."ka ti a,a nuih huk takah chuan ka harh chhuak zawk mai.

Phawk deuha ka en lai chuan nui chungin ka hmuiah a rawn fawp leh zeuh a,"Duhawmnu,"a ti leh a,min kaiin midang awmna lam chu min panpui leh a,kan titi laih laih laiin Raphael-a te semester a mi chuan Delancy nen chuan min lo ko a,tih tur a awm anih hmel.

"In lo chhawr nasa lutuk ang nge,"Raphael-a chuan a lo ti a,an nui huk mai,"Mipa hnaih loh tur aw,"a tih chuan ka melh rawm rawm a,"Melh pawh melh loh tur mipa i en duh chuan min en deuh tawp mai rawh,keimah hi ka hmelṭha ber,"a ti leh duah a,an nui uar uar a,Feli leh Hannah-i, Delancy phei chu nui uar tawh tak an ni ringawt.

Kalsanin tih tur ṭul ang chu kan ti a, programme an ṭan dawn vang chuan ṭhutna âwlah ṭhut mai kan tum a,khawi aṭangin nge maw an lo chhuah ni Feli leh Hannah-i chu an rawn lang hlawl a,"Ṭhutna kan lo hauh sak cheu,"an tia, Delancy nen chuan min kai dawr dawr mai.

A hnung berah chuan an lo awm a, games an lo khel a,an tui hlawm ngang mai.

Dylan-an,"Zothanpui nga ti nge username kan hman dun hi i thlak?I thlak dan lah hi a mah si,'Duhawmnu-i bialpa'i tia,tunge Duhawmnu-i chu?"a ti lauh a, ka va han zak tak,hepa hi....

"Mawla,"ka tih ṭhawt takah chuan midang an nui a, Raphael-a chuan,"Ka username ka thlak vang anih hi kan chak theih zel,"te chu a la ti deuh deuh a,Dylan pawn,"Nia,kan la chak char char,"a ti ve leh a, ṭha deuh chuan an khel leh rih.

Programme kan ṭan a, keini erawh hnung lamah kan bengchheng êm êm ringawt, programme lam chu kan ngaihtuahnaah a awm lo hrim hrim.

"Valentina, hetah elaw i lo awm?"Felix chuan kan lama rawn kal pahin a ti a, Zothanpuia zik zek chuan ring fahranin,"Hepa tê hian a melh strawberry che em maw ni?"a ti a,a sawi ring ropui si.

Felix pawh chu inthlahrung deuh hian a kalsan nal nal a,a kal liam chiah tihah Zothanpuia chu ka chum nawk nawk a,"RAMHUAI,"ka tih chuan,"Ramhuai,"hi min ti ve ziah suh,"a lo ti a,a lu buk lutukah chuan ka kek a,"Ana,ana,ana lutuk,"a ti a,ka thlah a,ka melh râwm râwm mai.

Ka ṭhu tum bur a,min biak lungawi a tim ngat ngat a, ka chhang duh eih lo,chhan chu sawi loh a melh pawh ka melh peih lo.

"In inhmeh e...."Feli leh Delancy chuan an rawn ti a,ka la tum bur tho."Tum tawh lo la...a nuam lo e..."te a ti thul,"Duhawmnu,"ka beng bula a rawn tih leh chuan thinrim viau e tiloin ka lai leh tawh,ka lungawi leh ta nge nge.

"Banah leng ang u..."Hannah-i chuan phur deuh hian a rawn ti a,"I sawi anih vang hrim hrimin ka peih lo,"Edmond chuan a ti a,"Nangmah chiah i kal lo ang,"Hannah-i chuan a ti a,"Ka kal dawn lo ka tih loh kha,"a ti leh lawi a,an inmelh rum lutuk.

Kei chuan thil dang daih ka ngaihtuah an inhmeh reuh lutuk.