Moonlight chapter 4

Moonlight chapter 4

by:venpuii

"Raphael-a chuan a tuar ve i ring em?"Delancy chuan a rawn ti a,chhan ngaihna ka hre lo,a tuar chu ka ring eng ang pawn ngengin luhlulin sual viau ṭhin mahse mihring ve tho a nia, thinlung a nei ve tho a,a na lo bikin ka ring lo.

"Midang pawn tent an ṭhiat tawh sia, ṭhiat ve tawh ang hmiang,"nui paha ka tih chuan,"Lo ṭhu rawh,in lo kalna lamah i chau lutuk ang keiman kan ṭhiat ang nge,"a ti a,amah chauh chuan a hahthlak dawn tih ka hriat ve reng vangin a phal lo chung ka pui lui a,kan ṭhiat zo har lem lo.

Haw tura kan inpeih meuh chuan khua a thim ruai tawh a,bus awmna thleng tur chuan thui lo te kal kan la ngaih vangin kan inzui dam dam a,bus awmna lah chu kan thleng har êm êm mai bawk si.

Bus awmna kan thleng a, Delancy nen chuan a hnung lam kan chuh a, tukverh bulah chuan min ṭhut tir a,"Hla ngaithla ang,"a tih vangin ka bag chu ka hawng a,kal lama Raphael-a thil min lei lo awm ngat ka hmuh chuan amah chu ka ngaihtuah ve deuh a,ka hre lo,a hma kha chuan ka hlau ṭhin teh meuh mai tunah ka hlau lo ka tihna ni loin kan inzui ve nasa a,ka laka a ṭhat êm vang pawh hian a ni maithei ka ngaina chu ka ti lo ang a,a hma ai ngawt chuan ka pawh a ni mah ang chu.

"Eng nge i ngaihtuah vung vung?"min rawn sawi zawt paha Delancy'n a tih chuan ka harh zawk a,kan lo tlan chhuak der tawh.

Ka phone chu lain airpodes ka laa,"Eng hla nge?"ka tih chuan,"I duh duh,"a ti a,spotify-ah chuan lutin Christiana Perri hla 'A thousand years' chu ka play a,rei pawh ka ngaihthlak hmain ka lo muhil daih a,ka taksa an rawn sawi chet takah chuan ka meng siar siar a, Delancy hmel ka hmu nghal zat.

"Kan thleng tawh a,"nui chung hian a ti a,an lo chhuk nual tawh,thoin kan chhuk ve nghal a,kan in a inhlat lem loh vangin taxi kan hire a,ka nu leh pa pawh chanchin ka la hrilh lo.

Tunah dar 11 a ri thuak tawh a,an mut ka rin tawh vangin ka nu chu ka call a,rei fe ka nghah hnuah a lo chhang ve thei hram a,"Hello,Mate,"phak zet hian a rawn ti a,kan thil tawn ang te chu hrilh zung zungin ka dah a, Delancy pawn a chhungte a lo call ve mek bawk.

Kan inkawtah taxi chu a ding a,gate bulah ka pain min lo hmuak bawk.Riak ve tura kan ti na chungin Delancy chu a haw lui a,ka pa nen chuan kan lut a, inchhunga kan luh fel rualin ka room lamah ka chho a,tui lum chuan ka inbual a,ka mut ve theih meuh chuan dar 1 a lo ri vang tawh mai.

Zan dang ang thoin ka muhil leh thei ta der lo a, ngaihtuahnaah Raphael-a a awm ve reng bawk.

Zing lamah chuan ka lo chhing ve sek nge ni,sana ka en chuan zing dar 9 a lo ri tawh a, college kan kal dawn loh vangin ka hmanhmawh lem lo.

Ka ṭhu chhuak a,ka mut chhuak chu ka thle leh lup ṭhin,mu ṭhain muthilh leh mai ka tum a,ka phone rik vang chuan ka harh zawk.

Ka nu call a ni a,ka pick rualin,"Bawihi,e hei i pu nau kha a zual thut a,i pa nen kan kal a ngai dawn a,kan châm rei deuhin ka ring,"a rawn ti a,"A va zia lo ve,tluang deuhin in kal dawn nia,"ka ti ve a,keimaha ka awm leh mai a ngaih hmel.

Call kan dah hnu chuan ka mu ṭha sauh sauh a,ka phone a ri leh tawh,phone screen a Delancy hming ka hmuh chuan ka pick vat a,ka mut chhuak nen,"Eng nge?"ka ti bak hlur a,ngaihno a bei lo viau mai.

"Lo insiam rawh,kan principal nu kha an vui dawn,kan college students zawng zawng deuh thawin kal an tum,kan semester group-te kha en ve ṭhin ta che,"a ti hluk hluk a,"Ka kal peih lo,"ka ti a,ka peih lo tak tak.

"Valentina Lalruatpui,lo insiam rawh,anih loh chuan ka hnuk chhuak ang che by order Delancy Zosangpuii,"a ti a,call a dah daih.

Thaw halhin ka tho a,anih loh chuan min rawn hnuk chhuak leh duh tak tak ang a mawl si.

Ka insiam a,kawr dum leh puan dum ka bih a, pheikhawk flat ka bun thawk a,ka sam chu claw clip hmangin ka clip a, cream ka inhnawih thuak thuak a,ka inpeih chu a ni der mai.

Inhnuaiah chhukin kawngka ka kalh a,gate atanga ka chhuak chiah chu Delancy lo phei ka hmu a,kan intawh rual rualin,"Monu interview,"a tia a ngaihna ka hre lo reng reng.

"Mawli nangmah hi Raphael-a chhungte monu tur tihna,"ka bang bo hmel a hmuh chuan a ti a,melh rum tak ka ni.

Taxi a lo din rual chuan kan lut a, address ka hriat ve miau loh vangin Delancy chuan driver chu address a hrilh mial mial a,kan tlan chhung chuan kan titi a,in lian zet kawta taxi a din rual chuan kan chhuak a,an in chu lian tak a ni.

An lo zai ṭhap ṭhap a,kan college student puite awmna lamah chuan kan phei a,inchhunga luh kan hreh tlang deuh vangin kan C.R. leh mi 5 vel an lut a,midang ho zawng chu pawnah kan lo ṭhu thung.

Vuina programme a zo a,thlan lam an panpui dawn a, Delancy dawr kal a lo la let loh vangin ka zawng kual a,ka hawi let chiah chu ka hnungah Raphael-a a lo ding kur a,ka phu nasa lutuk chuan ka ka ka veng leh hman ta lo.

"Oii ramhuai,"ka ti leh pek tawh,a mitmeng rum lam lek lek chuan min en a,a mitmeng chu ka chhiar thiam lo,vei nei hmel a pu a,a piin a kalsan chu a tuar viau anih ka ring.

"Valentina,hetah elaw i lo awm,haw ila,"ka bana rawn vawn pahin Delancy'n a rawn ti a,a bulah chuan kan semester a mi Hruaizela a ding bawk.

Min kaiin min kalpui dawr dawr a, Hruaizela leh Delancy chu an titi mawlh mawlh a, kei chuan Zothanpuia ngawt kha ka lo ngaihtuah daih.

A chhan ka hre lo,mahse eng nge maw hian min mawlh leh tet tet tawh,hnung lama leh hawi ngawt chu ka duh a,ka ngaihtuah nawn hmain ka hawi let a, Raphael-a bulah chuan Esther-i a ding a,min lo la en reng.

Delancy'n min pawh dawr dawr takah chuan ka leh hawi leh vat a,"Hruaia hian motor a keng a,a rualin haw mai ang,taxi fare safe,"nui kur kur chungin a ti a,ka chhang lem lo.

Hruaia motor-ah chuan kan pathumin kan chuang a,ka ngawih reng laiin Delancy leh Hruaia an titi mial mial a,min biak chuan ka chhang a,ka ngaihtuahna chu hmun dangah daih a awm thung.

Delancy-te in kawtah chuan car chu a ding a,chhukin Delancy bulah ka nu leh pa zin thu hrilhin Hruaia pawh chu lawmthu hrilh ta lo chuan kan in lam ka pan a,ka awm dan hi eng mah ka hrethiam lo.

Inchhungah chuan lutin ka thaw chhuak ham ham a,inthlakin in ka ti fel mawlh mawlh a, ka tih fel zawh chuan rawng pawh ka bawl lo.

Ka intifaia dar zat ka en chuan dar 3 a lo pel tawh, ṭhuin drama ka en a, ka drama en pawh chu mumal pawn ka hre lo reng reng.

Dar 10 velah chuan phone call ka dawng a,number hlang aṭangin a ni,ka pick up ta tho a.

"Lo chhuak teh,"a rawn ti a,"Tu nge?"ka tih chuan,"Ramhuai,"a ti a,a nui ri suh mai,amah a ni em?

"Raphael,"ka tih chuan,"Imm,lo chhuak teh,"thatchhe aw zetin a ti a,"Nga tan?"ka tih chuan,"Lo chhuak phawt teh,gate pawnah ka awm,"a ti a,thoin ka chhuak a,kawngka chu nam kharin gate pawnah ka chhuak a,tu mah ka hmu lo.

Inher leh ka tum chiah chu min pawt her lawp a,"Thanghniang,"a ti zawi sup mai,"Thanghniangi ka ni lo,hey,"ka ti a,ka tal bat bat lai chuan nghet zetin min kuah a,ka chhipah a khabe a nghat a,"Rei lo te...."a ti a, a thluk duai duai bawk si.

"Zu i in em ni?"ka tih chuan min thlah dul a,a mitah tak ka en bawk,"Tlêm...."a ti a,a aw chu a fan ṭha duai duai lutuk ringawt.

"Eng nge rawn tih i tum?"ka tih chuan,"Ka hre nang,"khi vur vur a a tih chuan ka thaw hak a,"Mawla,"tih paha kal mai ka tum chu a thusawi vang chuan ka ding chawt.

"Dawi thiam i ni em ni?I kianga ka awm chang apiangin sawi fiah thiam theih loh khawpin ka danglam ṭhin, tu hnen aṭang maha ka neih ngai hauh lo hlimna te, hahdamna leh thil dang tam tak, nangmah vang hian ka in thlâk danglam nasa takzet,hei hi an sawi ṭhin 'duhna' anih chuan kei hian ka duh che Valentina,"tih chu a ni.

Chhan ngaihna ka hre lo va,inchhungah chak deuhin ka lut ta ringawt,kawngka ka khar chiah chu ka thin ka dawm a,a phut dan a dik lo reng reng.A phu rang lutuk ringawt.

Thaw hakin inchungah ka chho a,ka mu nghal thak,ka mit ka chhing a,ka tum loh lutukin Lalramhuaia hmel a lo lang zel a,a tawpah chuan ka ṭhu chhuak nawlh,ka lu ka thing leh nawk nawk,tih ngaihna dang ka hre lo.

Ka phone a rawn ri a,ka en chuan ka nu a lo ni,ka lak rual chuan,"Aw,bawihi hei kan thleng chiah e,i mu dawn tawh em?"a rawn ti a,ka mut tawh thu ka hrilh a,rei fe kan inbiak hnuah a dah thei hram a,ka mut chu a chhuah ve deuh tawh vangin ka lo muthlu a,ka harh leh chuan khua a lo eng ut tawh.

College kan chawlh tawh dawn loh vangin ka tho vat a, intifai turin bathroom-ah ka lut zui zat.

Rei tawk fang ka inbual hnu chuan ka chhuak a, Christmas a hnai tawh a, khua pawh a vawt vur tawh mai.

Ka inpeih chuan Delancy-te in lam bawk chu ka pan leh a,an gate ka hawng tur chiah chu anah zawkin a rawn hawng a,min nuihin,"Nimin khan engmah i sawi si lo va,i hmanhmawh bawk sia, ka lo be hman bawk si lo che a,i ṭha maw?"a lo ti var a,"Ka ṭha,ka chau deuh a,"ka ti ta ringawt.

"Tunah eng nge i an?"tih pahin ka chal a rawn dek vut a,"Ka ṭha,min ngaihtuah suh,"nui chungin ka ti a,a kut chu a la thla ve mai.

Kan kal chhung chu kan titi bawrh bawrha, college gate bulah chuan Hruaizela a lo ding a,a ban lo vai zeuhin kan lam a lo pan a, Delancy nen chuan an inbe nghal bawrh bawrh.

Dan ngaitein kei ka ngawi leh ran a,min biak chuan ṭha deuhin ka chhang ve mai, Delancy'n min rawn kheuh zeuh a,ka hawi chhuah rual chuan Raphael-a ka hmu a,a mit chu ka chungah a fu leh ran tawh.

A pi thihna a la rei si lo va,ka hmu chu mak ka ti ve deuh.

Hruaizela chuan ka darah a rawn khawih zawk a,kan nghak tawh che tih paha ka dar a rawn khawih chuan kal mai kan tum a,Hruaizela hmai chu a rawn ri nghal sawk a,a thal nghal tawp mai.

Ka hawi chhuah chuan Zothanpuia ngei mai chuan rum zet hian min lo en a,chek hluk a, Hruaizela kaih thawh mai ka tum chu Zothanpuia chuan min rawn phih lawp a,min kai dawr dawrin a bike-ah chuan min hlang nawlh a,"Eng thil nge i tih hi Zothanpui?"aw ki sang fahrana ka tih chuan,"Ti khan ṭhu ṭha hle hle rawh,"a ti a,ka dawhtheih chin a pel ve ta tlat.

Chhukin ka kal a,pen hnih bak ka pen hman lo,min rawn pawm nawlh a,bike-ah chuan min ṭhut in a ṭhu zui thak,chhuk ka tum a, a che rang si,a bike a sang bawk si a,ka chhuk thei lo,helmet a khum zawh chuan chak deuh hian a tlan chhuak a,"Min kuah rawh,"a ti a,ka kuah dawn lo hi a ni tawp,ka kuah duh mai loh vang chuan a aia chakin a tlan leh a,ramhuai speed chiah chiah.

Aizawl khaw pawnah chuan bike a ti ding a, ka chhuk rualin kalsan mai ka tum a,min kuai her leh nawk tawh.

"Ka zawhna kha Thanghniang,"a rawn ti a,ka hming Thanghniangi a ni reng reng lo."Eng zawhna? Thanghniangi ka ni lo,"ka ti vin ve hlur a,phun hlukin,"Ka duh che ka tih kha,"a ti a,a tih tak tak ka ring miah lo.

"Fiamthuna chi a awm, Zothanpui college-ah min thlah leh rawh,Hruaizela kha,"ka tih chuan thip deuh hian min en a,min thing nghal nawk,"Kha mihring kha ka thah i duh loh chuan a hming pawh kha vawi khat mah ka hriatah lam tawh suh,"a ti a,na zetin ka darah a hmer a,ka mittui a hnam sawk thei.

"Ka sawi awmzia chu i hria em?"a ti leh a,ka hlau,a mitmeng chu rawn thlakin,"Tih palh, tih palh ka ti na che a,ka zawhna kha?"a ti leh a, a kut chu la thlain,"Kan thei lo, Raphael,ka thei lo,"ka ti a,a mitmeng a danglam leh hlawk tawh.

In seh ruh ṭawlh ṭawlhin min en a,a bike-ah chuan va chuangin,"Lo kal rawh,"a ti a, ṭha deuh chuan ka kal ve mai.

Ka chuang fel awt tihah chak deuhin a tlan a,tiang em em a bike chakah hian ka la chuang ngai lo,ka mit ka chhing a,ka lung a su dup dup a,tlak ka hlauh vang chuan a kawrlum hmawr teah chuan ka man khawm a, ka thaw a hah tet tet mai.

Bike a din hnu chuan ka mit ka meng a,kan in kawtah kan lo awm daih, college kal mood-ah ka awm tawh lem loh vangin ngawi rengin ka chhuk a,gate ka hawn dawn chuan a tlan chhuak ri ka hre nghal zat.

Phur lo zet chuan inchhungah ka lut a, nilengin ka ngaihtuahnaah a awm a, ngaihtuah loh luih ka tum pawn ka thei lo.

Delancy pawn min lo call a,ka kal dawn loh thuin ka chhang a,"In inkara thil thleng min hrilh vek ang che,"call a dah dawnah a ti hram.

A sawi danin Hruaizela pawh a ṭha a tia,miin min van sawi duh leh dawn tam em aw...

Tlai kamah phone call ka dawng a,ka en chuan ka cousin ka nu u nu Dami fapa U Kimkima a lo ni,ka pick rual chuan,"V,Delhi aṭangin ka lo let a,nutei kha ka hrilh tawh a,Lunglei ka chhoh hmain zan hnih ka lo riak dawn aw,"a ti a,"Khawi laiah nge i awm?"ka tih chuan,"Lengpuiah,hei taxi ka la fel ka lo chhuak dawn e,"a rawn ti a,rei tawk fang kan inbiak hnuah kan dah a.

U Kimkima a awm rih dawn vangin tiin rawng chu ka bawl a,ka bawl rei khawp mai,door bell a rawn ri a,ka thil tih lai dah sawk sawkin kawngka chu ka hawng a,u Kimkima a lo nui heu mai.

A tih dan ngai têin ka chhip sam chu a tuai puat puata,ka run tawk a lo tling leh viau mai.

"Eng nge min lo hawn?"ka tih chuan,a bag a nghat a,hoodie pink leh eitur min pe a, eitur min peknka en chu ngaihtuah chhuah miah loh tur ka ngaihtuah chhuak,ni e,amah kha,chupa chyps lollipop cherry flavour a tel miau vang a ni.

Ka en vung vung lai chuan ka hmai zawnah a kut a rawn vai thuak a,ka harh zawk mai,"I va ngaihtuah mûk hmel ve,"a ti a,lu thingin,"Engmah ngaihtuah lo ve,"nui chungin ka ti a,ka rilruah erawh amah a awm leh rauh rauh tawh.

Rawng ka bawl laiin u Kimkima a lo intifai thung a,rawng ka bawl zo kan ei del meuh chuan dar 8 a ri ve leh thuak tawh.

"Dawrah kal ang,thil ka lei ang che,"a tih vangin dawrah ka kalpui leh a,dawr chhunga a duh a thlan kual laia dawr a lo lut ve te vang chuan ka ngaihtuahna a chawl vek.

Esther-i chuan in tineitu deuh hian Zothanpuia kut chu a vuan a,a ṭawng vei zat zat,a kut mawlh chu ka lo hmu mawh a, Zothanpuia chuan lak thlâk sak a tum chhin eih lo.

Ka en reng laia,"V,"u Kimkima'n a rawn tih takah chuan ka hmaa mite pawh chuan ka lam an lo hawi a,ka dara rawn vawn pahin u Kimkima chuan,"Duh i nei em?"a ti a,ka lu ka thing ringawt.

"Kha,"tih pahin lollipop min pe a,"I duh chi an nei tawh lo,"a ti leh a,ka bu ringawt,ka mit sirin Zothanpuia-te chu ka en reng a,keimah aṭangin a mit a la san eih lo.

Dawr aṭanga kan chhuah dawn chuan Dylan, Edmond leh Dennis an lo inzui lut a,min hmu chu mak an tih hmel viau mai.

Peka rawn lut chuan phone en pahin,"Eng nge Esther-i sawn Raphael-a saw a zui char char a?"a rawn ti a,a rawn hawi chhuakin ka hmel a hmuh chuan a ṭhen chawih a,ka nuih ringawt.

U Kimkima chuan min kuah chhuakin in lam chu min panpui leh a,call centre-a a nileng hun hman dan vel a sawi pawh chu ka hre mumal eih lo.

Inchhung kan luh hnu chuan mit ka duh thu sawiin ka room-ah ka chho a,ka lut fel chiah chu ka thaw hawk,ka sawi thiam si loh i pikna chuan min tuam le up up tawh.

Lehkha zir tur chu khumah ka in chhawp a,room kawngkhar chu kalhin khumah ka lawn leh a,rei pawh ka zir hmain ka mutthilh san leh daih.

Ruah sur riin min kaih thawh vang chuan ja ṭhu hlawl a,ka mutthilh san ka lehkhabu ho chu ka khum bul side table-ah an lo awm leh thlap tawh.

Room kawngkhar ka kalh a,puan lah chu ka lo sin ṭha diam bawk si,bakah ṭhu muin lehkha ka zir a, pangngai deuhin ka mu bawk.

Ka hawi kual laia ka ka khum lu dinglama lollipop ka hnuh chuan ka en chiang vat a,a ngai bawk a ni.

Tho vatin balcony-ah ka dâk chhuak a, tumah ka hmu lo, ngaihtuahnaah amah bawk a lo lang leh tawh.

Ti nge maw he ramhuai hian ka ngaihtuahna a lak pen tak tlat mai le.