Moonlight chapter 3

Moonlight chapter 3

by: venpuii 

"I chau em?"a rawn ti a,ka lu ka thing a hmuh chuan,"In inbia em?"a ti a,lu ka thing leh.

"Oii,hmani vang kha a ni hrim hrim,"a ti a,keipawn anih ka ring.

Darkar chanve ṭha zen zawn kan chawlh hnu chuan kal an rawt leh a,ka hawi kual lai chuan,"Kha,"tih ri ka hria a,ka hawi chuan Raphael-a chuan polythene hi ka lamah a rawn lek va a,ka hawi â heu lai chuan,"Ei rawh,"a ti bung leh nghut a,ka la la mai lo.

Phun hlukin ka kutah a rawn hmeh bela,"Ka lawm e,"ka tih chuan min en rulh ringawt a,ka awm hi a ti nuam hlawl lo.

A helmet khum pah chuan bike-ah a lawn a,ka eitur ken chu bag-ah khung sawk sawkin ka lawn a,a tlanchhuak mai dawn em maw tih laiin ka kut chu a rawn la a,a kawngah a suih bet hmiah a,"Ka tlanchak dawn,"a ti a, ka ngawi kar ringawt.

Ka hawi let chuan bus-a lut lo ho chuan phun bul bulin min lo en a, Es-i leh Hlimi pawn min melh rum lutuk.

An pahnih mai ni lo hmeichhe dang pawh chuan min melh no lo hlawm lutuk tawh.

Bus ho chu an tlan hmasa a,an hnungah chuan kan zui a, Raphael-a ṭhiante chuan min rawn fiam leh zuk zuk ṭhin a,a hmasa berah kan tlan a,kan hnungah chuan a ṭhiante paliin min zui a, Dylan-an min lo pawh lai pawh engmah ka hre lo reng reng.

Kan tlan chhung zawng chu ka hmaa mi nen chuan kan inbe eih lo a,sawi tur ka hriat loh bakah hmania ka thil sawi nen,biak te chu thih hrehin ka hreh.

Darkar hnih vel kan tlan leh hnu chuan kan thleng a, bus pawh a lo ding ṭhap mai, Delancy ka zawng nghal a,kan inhmuh chuan,"Oii,a kawnga a kuah tir lai che khan an en duh lutuk cheu,in inhmeh lutuk,"a ti a,a chalah ka nam sawk.

Kan tam em vangin professor-te chuan kal hran an rawt a,hmun thuma kan kal hrang chung pawn tam tak kan la ni.

Kan group chu professor Chalthuia'n min ho a, Raphael-a te ṭhianho pawh kan group-ah an telin ka hria.

Hmun zawl lai deuhah chuan tent kaih an ti a, Delancy nen kan tent kaiha kan buai lai chuan thli a rawn thaw vuk a,kan tent chu a chhem chhe vek.

"Oii ka rei,"tih deuh ṭhawt pahin Delancy chuan a kaih ṭha mawlh mawlh a,kan kaih ṭhat leh vangin kan zo har reuh fu a,kan zawh meuh chuan ei rawngbawl an lo ṭan tawh.

Rawngbawl chu kan zo a,ka ei fel meuh chuan dar 7 a lo ri tawh a,zawl zau laiah chuan mei an chhem hluah a,guitar an perh a,an zai dial dial mai.

Kan ṭhian dun erawh chuan tent chhungah kan awm a,ka bag ka hawn chuan vawiina Raphael-a thil min leisak ka khung tak chu a ngai ngaiin a lo la awm a,phawrh chhuakin ka en kual a,chips,cold drinks, chocolate leh lollipop a lo awm a, lollipop ka en chian chuan hman zana mi ang tho kha a ni.

"A pek che kha a mi?"Delancy'n a rawn tih chuan chhang loin ka lu ka bu ringawt a,min chhaih zuk zuk a,tih ngaihna pawh ka hre tawh lo e a.

Ka bike chuanna ka sil deuh nge,dar 8 velah chuan ka zanlai fel tawh.

Ka harh leh chuan zai thawm pawh a reh fel tawh a, phone sana ka en chuan zan danga ka ṭhan harh hun tho,dar 12 bawk a lo ni.

Thla a lan ka ring vangin hlauh pawh sawi loin ka chhuak a,thla chu a lo de kalh a,in ni ve em chu ka hre lo, keichu arsi ai pawh hian thla khi ka ngainain mawi ka ti zawk a,a chhan mumal pawh ka hrelo,thla hian zun a nei nimaiin ka hria.

Ka luh leh hnu rei lo teah chuan ka muhil ve mai bawk.

"Tho teh tho teh,"tih paha ka taksa an rawn sawi lâwp lâwp chuan chiang lo ruaiin ka mit ka meng a,ka mut chu chhuak tak a la ni.

Min tung tho zawt a,harh chu chiang duh tak a ni.

"Valentina,in ti harh rawh, professor Chalthuia fanuin ui note a ken kha a bo,"Delancy'n a rawn tih chuan ka thaw hak a,"Engtia tih tur nge?"ka tih chuan,"Kan zawng dawn, tho la lo kal rawh,"a ti a,thoin mutna te chu ka tifel sawk sawk a,ka hmai chu phihin ka bag ka laa pawna ka va chhuah leh chuan an lo reh diak tawh.

Professor chuan,"Midang an kal vek tawh a, Raphael-a a la rawn tho lo a,va kaitho la in pahnihin in zui mai rawh u,"a ti a,ber kher zel hian aw....

"Va kai tho vat la,"ka chet mai loh vang chuan a ti a,ka va han phur fahran lo tak.

"Khawi ber saw nge a tent?"ka tih chuan tent lian ber chu a kawk a,"Ka lo va zawng ang a,a thoh hunah in zawng ve mai dawn nia,"a ti a,a kal daih.

Insang marin mahni ka infuih mawlh mawlh a,tent lam chu ka pana,a lo la mu vum thur mai.

Ka sawi a,a chhungah chuan vak lutin ka sawi leh a,a tho thei mai lo,kun leh ka tum lai tak chuan a rawn tho thut a,ka chal a ri kawrh thei.

Ka chal ka tuai vut vut lai chuan a rizai chu a rawn hawng a,min hmu chu mak ti hmel a pu a,"Remi uite a bo a,zawn a ngai a,"a men rum êm vanga ṭi duk chuan ka tih chuan min chhang loin a tho a, keipawh chu ka chhuak nghal a,ka chal chu ka tuai rauh rauh mai.

Rei lo teah a lo chhuak a,"Khawi lamah nge kan kal dawn?"a jal nul nul vanga ka tih chuan rawn hawiin,"Ka hre lo,"a ti chhum deuh hmuk a,a muhil lai ka kaitho chu a lawm chiah lo em maw ni.

A hnungah chuan ka zui ve zel a,dar 3 pelh tawh hnu pawh chuan eng ui mah kan la hmu lo,kan awmna chu ngaw a ni a,a thim deuh ruih tawh.

Phone lah chu signal ka nei der lo a,ka hmaa mi lah chu ka be ngam lo.

Signal ka zawng a,ka hawi kual ruai a,ka hmazawn ka en leh chiah chu ka hmaah Raphael-a reng reng ka hmu ta hauh lo,phawk zeta mengin ka ko a,thawm erawh a reh tlawk tlawk mai.

Ka hmaah chuan ka rin kal ta tawp a,ka ṭap ṭuau tawh,khua lah chu a thim chak êm êm mai bawk si a,ka hlau ngang mai,engmah ka la ei loh vang chuan ka pum lah chu a ri ruih ruih a,ka dang lah chu a ro mai ni loin a charin a char vek tawh.

Rei fe ka kal hnu pawh chuan Raphael-a hmel reng reng ka hmu lo,ka hlau lutuk leh ka rilṭam lutuk vang chuan ka tha a khur ṭan a, kal turin tha reng reng ka nei tawh lo.

Ka au dawn chuan sa eng emaw te hi ka au chhuak deuh nawlh ang tih ka hlau bawk si a,tih ngaihna dang hre tawh hek lo le,ka ṭhu hnawk a,ka ṭap ta zawih zawih,ka hlau lutuk te chu ka tawm vek tawh.

A vawt bawk si a,ka khur dawt dawt thei hial mai.

Ka ṭah chhuah tuar tuar lai chuan,"Ka hnungah i kal ve reng emaw tia,min tih hlauhthawn zia hi i hria em?"tih ri ka hriaa,taksa lum zet hian min rawn kuah nghal zat bawk.

Min kuah ngheh sauh sauh pah hian,"Min ti hlauthawng lutuk,"a ti leh a ka hlauhna a la reh loh vang nge ka la ṭap khur dat dat a.

Ka chhipa rawn fawh pahin,"I him tawh,ṭap tawh suh le,i bulah ka awm hi,"a ti a,ka sawifiah thiam si loh thlamuanna min pe ni maiin ka hria.

Min kuahna thlah hauh si lo chuan ka samah dim tê têin a chul hliau hliau a,a awmah ka hmai ka phum nghal rawk rawk.

A awmah chuan min pawm bet sawk sawk a,"I ṭha tiraw?"a awma min bei tir paha a tih chuan,"Aih,Mawla i bawp a sei si ka bawp hi en ta che a tawi em hi,i kal chak si signal ka zawng ve tho a,midang ngaihtuah nachang te hi hre ta che,tinge i sual bik em em?Hmeichhia ka nia mipa anga treat chi pawh ka ni lo, duh ang anga kal ve hmawk hmawk thei pawh ka nih loh hi ka bawp hi a tawi em hi..."ṭap ṭuau chunga ka tih chuan a thaw hak a.

"Ka tihpalh,ka thiam loh a ni,ka ngaihvenin ka ngaihsak reng tawh ang che,"a ti sup sup a,"Ka duh bawk lo,i sual ropui si,"ka ti leh a ka sam chu a chul hliau hliau a,ṭah loh ka tum pawn ka hnuk a ti ulh zel.

Ka hmai bulah chuan rawn kun hniamin a nui suk a,"Min thlak danglam mek zel alawm hei,"a ti a,ka bianga ka mittui luang chu a kut chuan a tuai hul sawk sawk a,"Lo kal rawh le,"tih pahin min kai tho a,min paw nawlhin,"Bei rawh,"a ti a,thu awih deuh chuan ka bei ve mai a.

A kel zel a,min hlang thlain ka hmaah chuan mei a chhem a,a chhem zawh chuan a ṭhu hnawk a,a mit a chhing vang vang.

Ka bag-a a eitur lei ka dah chu ka hrechhuak a,ka bag chu la thlain ka hawng a,ka pum chu a ri leh ruk ṭhin.

Eitur chu ka zawng a,ka hrechhuak nizan khan ka phawrh daih tak alawm.

"I ṭha em?"a rawn ti a,"Ka ril a ṭam,"ka ti a min rawn enin,"Engmah ka ak lo,"a ti a,ka pum ka dawm vang vang.

Tho tharhin a kal nal nal a,a zung dawn anih ka ring.

A lo let leh chuan kawlthei chhungsen tam zet hi a rawn lo a,min rawn enin,"Ei rawh,"a ti a,sawi nawn ngai lo khawpa rangin ka la a,ka ei nghal mawlh mawlh.

Ka ei zawh chuan,"I ei ve dawn lo a mi?"ka ti a,a lu thingin,"Aih dawn lo,"a ti a,"Ti nge?"ka ti leh.

"Ka ril a ṭam lo,"a ti a ka van awih lo mai mai tak.

"Muhil rawh ka lo veng ang che,"a ti a,"I mu ve dawn lo mi?"ka ti hê a,a lu buin,"Ka lo veng ang che,"a ti a,hnial tawh lem lo chuan ka ṭhutdan ka siam rem sawk sawk a,thingbul chu nghengin ka muhil ta siai siai a.

Ka muhil chu ka harh zawk a,khua chu a lo la thim deuh ruih a,ka hawi kual chuan Raphael-a reng reng ka hmu lo.Ka sirah lah chuan thawm a ri ruk ruk a,ka hlau lutuk chu ka tawm chawih chawih a,ka ṭhutna bula thawm ka hriat leh phei chuan tho nawlhin ka tlan chiam a,ka piah deuh a,mia ruangam ka hmuh chuan ka bawh rawk rawk a.

"Valentina,"a rawn ti a, amah a ni,"Kan awmna lai velah sawn ramhuai a awm chiang lutuk,"ka ti a,phawk zet hian min en a,"A ni a lawm,ka hmu lo na chu a thawm ka hria,"min rin loh hlau lutuka ka tih chuan,"Engtin nge thawm chu a siam?"a ti a,"A...ka sawi thiam tawh bik lo,a ri tawp a a ni mai,"ka ti a,a thawm rawn siam dan kha sawi thiam a har ve e....

"Lo kal rawh khawi lai takah hian nge thawm chu i hriat,"tih pahin min kai phei a,ke pen a sak ṭulh tawh.

"Khawi laiah hian maw thawm chu i hriat?"ka lam lo hawi paha a tih chuan hnim buk zet chu ka kawk vâ a,a va kal hnai a,hnim chu a keu chiah tihin,"Oiii ramhuai,"ka ti a,"Eng ramhuai mah a ni re re lo,ui note anih hi,"ui note var rawn pawm chhuah pah hian a ti a,"Vanlalchalthuaia fanu ta chu a mi?"ka tih chuan zawhna mitmengin min en a,"Professor Zama,"ka tih chuan,"Ka hre lo le,"a ti a,nuihza hmel a pu deuh,a nui lai hi hmuh tur a awm ngai pawh ka hre lo.

"Midang ho kha engtin nge kan pawh leh ang?"ka ti a,ka rilru chu a hah tet tet mai,ka phone lah chu ka hmang thei der lo,signal awm miau hek lo le.

"Ka bawp hi sei lutuk lo se chuan kan inhlauh lo nga, kan ṭhiante kan pawh daih tawh tur,"a ti a,nuihza insum hmel a pu leh tawh.

"Thil ka zawt ang che aw,"ka tih chuan a mit ko rawn sanin,"Imm...,"a ti a insiam ṭha sauh sauhin,"Ti nge midang nel tur zawng hian i awm ve ngai miah loh a?"ka ti a,min melh run run ringawt.

"Nui tam la, ṭawng tam la,mi hian an nel daih zawk ang che,"ka tih chuan tak deuh hian min rawn en a, hetianga a awm hi chuan engmah ka sawi ngam lo.

"Mu tawh rawh,naktuka kan kalna tur hi a la thui,"a ti a,a mit a chhing zui daih.

Keipawh chu tawm ṭha sawt sawtin ka mit ka chhing a,ka muhil leh har lem lo.

"Sava chiar ri nak nak thawm chuan min ti harh a, ka hawi kual chuan khua a lo êng ut tawh,ham bui bui chungin ka ṭhu ṭha a,ka taksa ka en chuan jumper hi a lo awm ran a,ka en chiang a, Raphael-a ta niin ka hria,ka hawi kual leh chuan ka piah daihah chuan a lo ṭhu a,a melh ngai a melh char char vang chuan ka aw ka thian kharh a,rang fahran hian a lo hawi phei a, ka inthlahrung leh hnuhnawh.

"I lo harh tawh a ni maw?"min lo pan pahin a ti a,ka bu ringawt,a mit a swn rum a,mutkham lo hmel a puin ka hria.

"I muhil ve lo em ni?"ka bul a lo thlen rual chuan ka ti a,a bu zeuh mai.

"Ti nge?"ka ti a,a nui nia,"Ka mutthilh ve chuan ramhuaiin a lo la daih ang che tih ka hlau a,"a ti a,a kiai leh suk.

"Kan ṭhiante chu zawng ila,"ka tih chuan,"Imm lo kal rawh le,"tih pahin a kut min rawn pe a,ka melh hu lai chuan,"Ka kaih loh che chuan ka bawp a sei sia i bo leh daih palh ang,"a ti a, a nui leh tawh.

A mumang a ṭha deuh nge maw ni,min kaia,ka zui ve det det.

Uite chu a pawm a, chawhnu lamah chuan kan ṭhiante chu kan pawh leh thei hram a,min lo zawng nasa hle a ni awm e.

Delancy nena kan titi mawlh mawlh lai chuan professor chuan,"Kan principal nu a thi a,kal ve kan ngai dawn si a, kan haw mai a ngaih hmel, Valentina, Raphael-a a kal tawh si a, bus-ah chuang mai rawh aw,"a ti a, a kal leh daih.