Moonlight chapter 2

Moonlight chapter 2

by: venpuii 

Inchhunga lo nghah ai chuan tiin pawnah chuan ka lo ding a,dar 11 a pel tawh,darkar chanve dawn ka nghah hnu chuan ka hmaah bike a rawn ding a,ka hawi chhoh chuan Raphael-a chuan a helmet a lo phelh a,min rawn enin,"Ka phone,"a ti a,a aw chu a nel awm teh chiam lo.

Phone chu ka pe a,inherin in chhûngah chuan ka lut a,ka mut a chhuak tawh viau nain assignment tih tur ka ngah si a,men rei ka ngai dawn khawp mai.

Kawngka chu ka kalha, ka room-ah chhoin khumah chuan mu chungin assignment chu ka ti a,a tam bawk si a,ka zawh meuh chuan zing lam dar 2 a lo ri vah tawh,in dah fel sawk sawkin ka mu a,ka muhil har lo khawp mai.

Ka phone riin min kai tho a,ka en chuan ka best friend Delancy call a lo ni a,ka pick rualin,"Lalruatpui ka nghak rei tawh lutuk che,i inkhawm dawn lo a mi?"vin zet hian a rawn ti a,sana ka en chuan dar 10 a lo pel tawh a,"Imm khawm dawn lo, nizan assignment ka ti a,ka meng rei lutuka,"ka tih chuan,"Aw,"anih chuan ka inkhawm peih bik lo, eitur ka rawn lei ang,"a rawn ti a,ka tellohnaah a awm peih lo tih ka hriat chian êm vangin ka hnial lem lo.

Call kan tih tawp hnu chuan thoin ka zi ar ar a, ka hmai tuai puat puatin ka hmai ka phih a,inhnuaiah chuan ka chhuk a,kawngkhar an rawn kik ve chiah.

Ka va hawn chuan Delancy'n min lo nuih var var a,eitur a khai bawr luka,"Nalh deuhin kan ei ṭeuh mai teh ang,"a ti a,kan nui hak hak.

"Ti nge i ke?"thil dang pawh kan sawi hmain a ti a,"Lo lut phawt la,"ka ti a,min kuahin,"I fimkhur lo leh pek em maw ni,"ka chala ben lawh pahin a ti a,"Mi fimkhur loh zar ka zo,"ngaihsam zeta ka tih chuan,"Maw?"a ti a,sawi ka tum lo asin maw le aw...

Kan ṭhut hnu pawn min la zawt sek seka,ka hrilh ta tawp,ka sawi zawh rual rualin,"Oiii oiii oiii a pawm che maw? Lalruatpui,oii keichu amak ka ti Raphael Zothanpuia'n kan misualpa'n a pawm che ania,"a ti a,a rak chel chul mai.

Ka nui ta ringawt.A eitur rawn ken chu kan phawrh a,a lei hnem ngang mai ka ei tlem a ti deuh nge phawk zet zet hian min en a,"Ka mu puar,"ka ti ta ringawt.

"Naktuk chu i rawn kal thei lo vang a.."zuai zet hian a ti a,"Kal thei ang,"a chips lei ei paha ka tih chuan,"Yes,"phur zet hian a ti a, ka kal loh chu a hlau ngang mai.

"Lo riak la,"ka tih chuan,"Anu leh apa kan phone ang nge,ka thawmhnaw chu hetah a awmin ka hria,"a ti a,"La awm,"ka lo ti vat.

Delancy nu leh pa chu kan phone a,an lo phal ve mai, rawng chu kan bawl dun a,chaw ei khamah kan intifaia, ka assignment pawh min ziah pui leh thlap.

Dar 8 atangin movie kan en a,a tawp hnu pawn a dang a en leh zel a,ka mawng a kham deuh avangin ka room balcony-ah chuan ka chhuak a,arsi chu a lo lang leh iar tawh.

Ralling chu ka bawh awr awr a,ka mit chhingin thawk ka la vang vanga ka ngaihbel nge ka hre lo,zan boruak chuan rim eng emaw a nei nimaiin ka hria.

"Tent camping kha i kal dawn em?Kal vek tur an tih kha aw.."ka bula rawn din pahin Delancy'n a ti a,lu thingin,"Ka peih lo, ramhnuai hi ka ngaina lo,ramhuai a awm palh ang,"ka tih chuan,"Kal ang mawh,kal ang,V,kal ang,"a ti ta sek sek a, ramhnuai hi engtin nge maw a ngainat theih bik em em le.

"Ramhuai lo awm ta se...ka,"ka sawi zo hman lo,"Ninawm,i bulah ka awm reng mai dawn lawm maw aw,kal ve ang,"a ti a,ngen tak tê hian min ngen a,hlau viau mah ila ka aw ta tawp.

Thil min dil ngawih ngawih tawh hi chuan tih sak loh hi har ka ti ṭhin.In nih ve tho ka ring.

Kan ṭhian,kan tana ui leh tih hreh nei ngai miah lo tana theih tâwp chhuah chu in hreh bik ka ring lo,kan tana in pe zo,tih hreh nei lem lo,kan hlimna tur anih phawt chuan engmah tih hreh ngai lo tana an duh ang tak tih hi chu a hlimawm ve hrim hrim.

Balcony-ah pawh chuan rei fe kan awm a,kan mut meuh chuan dar 12 a ri thuak tawh.

Alarm kan set ve naa,kan thawh meuh chuan dar 7 a pel thui tawh lutuk,ka bula ka thiannu hnar burh burh chu ka tung tho nawlha,phawk zeta rawn mengin,"Tu maw boral?"a rawn ti heu mai.

"Delancy Zosangpui,tumah thi an awm lo,kan hmanhmawh lo anih chuan tun atanga rei lo teah professor Chalthuia'n min that ang,"ka tih chuan,"Oii oii dar engzat nge kan tlai tawh viau a mi?"a ti a,"Tlai over lo,"ka tih chuan,"Imm ti khan lo insiam la,ka va phei ang nge,min lo sawm rawh,"ti zuah zuahin a la ding reng a,ka che vel chu min lo en reng a,"Zosangpui,i ṭawng zuah zuah a,i la chhuah tawp loh kha.."ka tih chuan,"E...ni tak ni tak,"a ti a,chak zetin a tlan chhuaka ka nui ta ringawt.

Keipawh chu inbual tawh lo chuan ka insiam ve nghal a,sana ka en chuan dar 8 a lo pel tawh.

Ka bag lain inhnuaiah ka chhuk a, kawngkhar chu kharin Delancy te in lam ka pana,kan ṭhenawm lawka awm an nih vangin rei lo teah ka thleng a,ka va luh hma chuan a lo chhuak ve chiah.

A scooty chu a start a,kan inphur chhuak nghal a,dan ngaitein eng eng emaw kan sawi a,kan nui leh hak hak thin.

College kan thlen chuan kan la tlai chhe lem lo, Delancy chuan ka ke a rawn en zeuh va,ka tuam tawh lo tih a hmuh chuan,"A dam tawh a mi?"a ti a,"Dam deuh,"ka ti ringawt kal zawng chuan tlemin a la na deuh.

"Oii saw nu ze zaw saw chu aw..."Delancy'n a lo tih vawng vawngna lam chu ka hawi a,kan senior Remmawi chu a lo melh no fahran lo khawp mai.

Ka dem hran lo, Delancy cousin hi Hlimi hian a lo kawp tawh vang anih ka ring.

"A in ha chhingin a thehlep bawk si a,mit a ti kham lek lek thin,"rawn hawi paha a tih chuan ka lo nui ringawt.

Kan en reng lai chuan Hlimi chuan Raphael-a thu lai mal chungah chuan a va ṭhu chat a, Raphael-a chuan a lo nam sawka a Hlimi a ding zawt mai,Delancy chuan,"Saw saw i hubby,"a ti zo chiah a sawi sual a in ti aniang a ngawi hmak mai.

Rum fêa melhin,"Engtin maw i tih Zosangpui?"ka tih chuan,"Ngaihtuah buai duh suh,a ho lutuk,"a ti daiha,ka va han melh rum tawh tak.

"Delancy,tent camping kha kal ho ila,"kan bula lo din pahin Simon chuan a ti a,min rawn en pah a,ka lo hawi san daih.

Delancy kawrah chuan ka pawt zeuha,"Kal pawh kan tum lo,kan hmanhmawh deuh a,anih phawt,"ka ngaihtuahna hria ni awm takin a ti a,min kaiin min kalpui dawr dawr a,ka rak ṭhat.

"Tinge?"tih pahin a rawn hawi let a,ka kuta vuantu Simon chu ka en a,ka kut chu lak let ka tuma,a hmer nghet lutuka,a na lutuk.

"Valentina,ka duh che ka tih kha,ka bialnu ni rawh,"a ti a,keiin ka kut chu lak let ka tum ngat ngat thung,"Valentina,"a rawn tih leh chuan enin,"Amak e..Simon tiang hian awm suh,ka sawi tawh kha,"ka ti a,ka aw ki chu a vin ta viau mai.

"Khai khai khai, Lalruatpui,hmeli,engtin nge ka nau hi i lo hnawl ngam zawk,nang hmeichhia,i eng hi nge maw a duha,a atchilh êm êm mai che le..."

Hlimi chuan a nau Simon-a bula rawn din pahin a ti a,ka kut lah chu Simon chuan a thlah duh der lo,"Ve a che,nang kha,mi kawp lawr i hrat hrat nen,ka thiannu hi a eng nge tha i ti maw? Kei hian kan hrilh ang che,a hmelthaa,a nunnema,a rilru a tha a,a rilru a zau a,a inpe zo a, thinlung tha tak a nei a,heng bakah hian ṭhatna tam tak a nei,chung a ṭhatna te chu engtikah mah i neih ve ngai hauh lo tur te an ni bawk,"Delancy chuan tiin Simon chu a melh leh ran tawh.

"Nangpawh,a duh lo che tih i hre reng a ni lawm ni,a zah pawh hi i zak lo em maw ni,miin an duh lo che tih hre reng chunga tihbuai reng mai,thlah vat rawh,"tiin Simon-a min vuahna chu a phih zawta,Simon chuan a thlah duh reng reng lo.

Ka hmai a ri sawk a,chumi rualin thawm a ri huk a,ka hawi chhuah chuan Raphael-a hian Hlimi chu a lo rek a,Hlimi hmai a sen vek tawh,ka pan vata,"Raphael thlah rawh,hei a hmai a sen vek tawh,thlah tawh rawh,"ka ti a.

A in thlah dul riai riaia,"Hmeichhia i ni hi lawm hle rawh,a vawikhat pawh a thleng nawn leh anih chuan ka that ang che,"a ti kha fak a, min rawn enin Simon-an ka kut a vawnna chu a en a,"Thlah rawh,"tih pahin Simon chu a rawn pana,Simon pawn ka kut a thlah a,an unau chuan an kal hna hna.

Raphael-a pawh chu a kalsana,midang chuan phun sep sep chungin min en a,ka zak lutuk,"Misualpa khan a chhan che tiraw?"awih loh hmel lutuka Delancy'n a tih chuan ka dar ka chhin uk a,"A chhan che,tak tak,mumang chu a ni em si lo va,"a ti a,a insik leh rih.

"Mawlhmuar,1st period kan neih kha,kal ang,"tiin ka kai a,ka ke na zawk zawk vang chuan ka ṭhen tlawk tlawka,ka kal lui ta tho.

A hmasa ber dawttu chiah a lo awl tawh vangin kan thu ta tawpa,kan ṭhu rei hman lo, professor Chalthuia pawh a rawn lut a,tent camping chungchang ngawt chu an sawi a,keiin ka peih loh êm êm laiin ka ṭhiannu erawh a phur ngang mai...

Ni leng chuan college-ah kan awm a, last period kan nei lo lawm nak laiin Delancy'n library kal a ti tlat a,kan kal leh ta chu ania...

Lehkhabu chu ka en kual a,ka enkual tak nain engmah pawh lak ka tum lem lo,ka enkual mai mai laia ka thu hriat vang chuan ka ding chawt.